Насны жаргал амласанаа ч маргааш болоход мартдаг орчлонд
Найз минь дурлал гэдэг чинь надад зоихгүй юм байна
Найрлаж суухад жаргал өөрөө хажууд шургалавч
Надаас түр алдуурсан зовлон нэхэн нэхсээр ирдэг юм байна
Хайр амласан зүрх бүхэн хуурмаг орчлонд төөрч
Хагацлын өмнө тулж зогсохдоо мартахгүй гэж амласан байна
Хөөрхөн бүсгүйд сугадуулан алхахад нь үгийг нь нэхэн асуувал
Хорвоогийн нэгээхэн мөчирт намайг орхисноо ч санахгүй байна
Нугасны муухай дэгдээхий нуурын усанд тольдох шиг
Нулимс ширгээсэн хайр ч зүрх үерлүүлэн уйлуулдаг юм байна
Надад л ирсэн хайр гэж совин дагуулсан учрал ч
Нартын энэ орчлонд хагацал дагуулдаг юм байна
Өрөөлийг хайрласан сэтгэл бүхэн минь шаналал дагуулж
Өр зүрхний дуудлага бүхэн шархлал л авчирч
Өнгөцхөн биш гүн дурладаг минь бурууг надад тохож
Өнчин нулимс урсахдаа ч надаар тохуурхан дуслаж байна
Хоёрын зэрэг дурлал надад зохиогүй юм чинь
Хосын дайтай амьдрал ч надад үлдээгүй юм чинь
Найрсаг энэ орчлон надруу л инээмсэглээгүй болохоор
Найз минь надад үнэндээ дурлал гэдэг чинь зохихгүй юм байна
Надад зохихгүй дурлалаар дахиж гоёхгүй ээ найз минь би
Насан туршийн жаргалыг ч мөрөөдөн суухаа болино
Намайг гэж андуурсан хуурамч дурлалд дөнгөлүүлэхгүй
Намар эртийн бороонд ганцаар шүхэргүй алхалнаа
www.URLAG.mn
