Хүний сэтгэлийн дотоодод болж буй хямрал, залуу хүмүүсийн сэтгэл хөдлөл болон дүрийг хурц тодоор илэрхийлсэн тансаг аялгуугаар дүүрэн байдаг Ж.Пуччинигийн “Богема” дуурийг хоёр өдөр, хоёр өөр удирдаач удирдана.
Улсын дуурь бүжгийн эрдмийн театрын тайзнаа энэ сарын 28, 29-ний өдрүүдэд тоглолтод дуурийг удирдаач, Урлагийн гавьяат зүтгэлтэн Н.Туулайхүү болон тус театрын ерөнхий удирдаач Ц.Тэлмүүн-Очир нар удирдахаар болжээ.
Дэлхийн суут хөгжмийн зохиолчдын нэг болох Ж.Пуччинийн хүн төрөлхтөн, сонгодог урлагийн түүхэнд үлдээсэн үнэ цэнэтэй бүтээлүүдийн нэг нь алдарт “Богема” дуурь юм.
“Богема” дууриа Ж.Пуччини 1895 оноос эхлэн бичсэн бөгөөд 1896 оны хоёрдугаар сарын 1-нд Турин хотын “Ла Режио” театрт нээлтээ хийсэн түүхтэй. Цомнолыг Францын зохиолч Анри Мургерийн “Богемын гудамжин дахь үзэгдлүүд” зохиолоос сэдэвлэн Луижи Иллика, Жузеппе Жиакоза нар бичсэн байна. Тэр үеэс хойш “Богема” дуурь Италийн дуурийн театруудын байнгын урын санд орж, тун удалгүй дэлхийн театруудын хамгийн их тоглодог бүтээл болж чаджээ.
Залуу эр, залуу бүсгүй хоёр танилцан дурлалцаад, амьдралын эрхээр түр салж байснаа үүрд хагацахын тулд дахиж уулзаж байгаа тухай тухай дуурьт өгүүлдэг. Парисын Богемын гудамжны байшингийн дээврийн хөндийгөөс эхэлсэн үлгэрийн мэт мөртлөө нэн бодит мэт эмгэнэлт хайр сэтгэлийн түүх өгүүлдэгээрээ “Богема” дуурь алдаршсан.
