Завхан аймгийн Орон нутаг судлах музейн археологийн танхимын гол үзмэрүүдийн нэг нь 61-р булшнаас олдсон цутгамал хүрэл морьд, саран хэлбэрийн чулуун зүүл, дөрвөн дэлбээт алтан чимэглэлүүд юм.
Цутгамал хүрэл морьд нь нийт 25 ширхэг олдсон. Хүрлээр цутгаж алтаар шарсан эд өлгийн зүйл юм.
Зарим морьдын хөл болон толгойн хэсэг эвдэгдсэн. Уг морьдын тайван хатирч буй байдлаар дөрвөн хөлтэйгөөр дүрсэлсэн. Нийт 10 морьдыг баруун, үлдсэн морьдыг зүүн хажуунаас нь дүрсэлсэн байна.
Саран хэлбэрийн чулуун зүүлт нь хадгалалт маш сайн. Үзүүр хэсгийг нарийсган шовх хэлбэртэй болгосон. Төгсгөлийг дугуйруулан гол хэсэгт нь нүхэлсэн. Нийтдээ цагаан саарал өнгийн хатуу чулуугаар хийж, сайтар өнгөлсөн эд өлгийн зүйл юм. Зүүлт эсвэл бэл байсан байж болзошгүй юм. Урт 13см, өргөн нь төгсгөл хэсэгтээ 3см хүрнэ.
61-р дурсгал булшны оршуулгын модон авсны гадна хэсэгт чимэглэж хийсэн дөрвөн дэлбээт алтан чимэглэлүүд нь бүгд ижил хэмжээ, хэлбэртэй.
Дөрвөн дэлбээ бүхий 2.7-3 см урттай. Уг чимэглэлийг модон авсны төмөр бүслүүрийн гол хэсгүүдэд ижил зайд тэгш хэмтэйгээр төмөр хадаасаар хадаж, тогтоодог байжээ. Одоогоор анхны хэлбэрээ хадгалан үлдсэн цөөн хэдэн чимэглэл археологийн танхимын гол үзмэрүүдийн нэг болж дэлгэгдсэн байна хэмээн Завхан аймгийн музейгээс мэдээлэв.
Ташрамд, тус музейд 2023 онд 100 гаруй үнэт үзмэр, эд өлгийн зүйлстэй археологийн танхим байгуулсан юм. Энэ танхимыг Алдархаан сумын Ямаан-Уснаас олдсон нийтийн тооллын өмнөх гуравдугаар зуунаас нийтийн тооллын нэгдүгээр зууны үеийн олдворууд дээр түшиглэн нээсэн байна.
