“Болор цом”-ын эзэн, яруу найрагч Ш.Лхамноржмаатай ярилцлаа.
-Уран бүтээлийнхээ шинэ цомгийг гаргасанд баяр хүргэе. Ингэхэд таны хэд дэх цомог вэ?
-Танай хамт олонд болон, уншигч, сонсогчиддоо баярлалаа. “Ижий улирал”, “Цаг мөнхийн хайр”, “Гийнгоо” нэртэй гурван цомгоо саяхан хэвлүүллээ. Зөвхөн цомог гэвэл, үүний өмнө 2006 онд “Зүрхний гижиг” дан яруу найргийн, 2009 онд “Даяарын амгалан” яруу найраг, дууны цомог гаргасан. Шинэ цомгийнхоо нээлтийг ирэх баасан гаригийн 15:00 цагт “Интерном” номын их дэлгүүрт хийх гэж байна.
-Цомогт таны шүлгээр бүтсэн, хүмүүсийн сонсох дуртай ямар дуунууд багтсан бэ?
-Урлагийн гавьяат зүтгэлтэн Б.Бямбабаяр, хөгжмийн зохиолч Цэн.Эрдэнэбат, Ш.Өлзийбаяр, Н.Баасандорж нартай хамтран бүтээсэн “Би чамд хайртай”, “Цаг мөнхийн хайр”, “Даяарын амгалан”, “Гийнгоо”, “Чиний эзгүйд” зэрэг хүмүүс их төлөв мэддэг болсон, залуусын дуулах дуртай дуунууд багтсан. “Болор цом” наадамд уншиж байсан, тэр хэрээр уншигч, сонсогчдын сайн мэдэх “Орчлон миний явах суух”, “Зун шиг амьдарнам”, “Аргадах шүлэг”, “Аав мод”, “Ижий улирал” шүлгээ өөрийн дуу хоолойгоор уншиж цомогтоо орууллаа.Ерөнхийдөө ямар утга агуулга, ямар сэдэвтэй бүтээлүүд орсон нь цомгийн нэрээс ойлгомжтой байгаа.
-Нэг дор гурван цомог гаргана гэдэг амаргүй байсан байх?
-Энэ бүхэнд намайг гэсэн найз нөхөд болон олон хүний сэтгэл, зүтгэл шингэсэн. Юуны өмнө хайрт аав Г.Шагдар агсан, ээж Н.Нэргүй нарынхаа гэгээн хайранд талархъя. Цомгийг бүтээхэд чин сэтгэлээсээ дэмжсэн Утга зохиол, нийгмийн ажилтны дээд сургууль, “Оюут хясаа” ХХК, “Амгалан батжих бясалгал гэгээрэл төв”-ийн хамт олон, хөгжмийн зохиолч хань Цэн.Эрдэнэбат, эрхэм дотны анд “Болор цом”-ын эзэн, яруу найрагч Ж.Мөнхбат, Барилга технологийн коллежийн захирал Б.Мөнхзул нартаа талархаж байна даа.
-Ойрын үед шинэ ном гаргах уу?
-Ирэх намраас шинэ номоо уншигчдынхаа гар дээр тавих бодолтой байна. Хоёр ч номынхоо эхийг бэлэн болгосон.
Ч.Зотол
