Дарвайтлаа будлаа гээд тэнэг биш
Даруухан харагдлаа гээд ухаантай ч биш
Хүнийг та нар гаднаас
Хүнээс илүү шинжих юм
Өөрийгөө та нар бусаддаа
Өөгүй мэт л сайрхах юм
Ганган дэгжин хувцаслах чинь
Галзуу солиотой хэрэг биш
Хөх бөгсөө ил гаргалаа гээд
Хөнгөн явдалтан ч бас л биш
Хөөрхөн төрөх чинь нүгэл биш
Хүмүүст таалагдах нь ч бузар биш
Яах гэж та нар нэгнийгээ
Янз янзаар мэрдэг юм бэ?
Ухаантай царайлж үг шидэлцэж
Уралдаж яагаад муулдаг юм бэ?
Толгойтой мэдлэгтэйгээ гайхуулан байвч
Тоть шиг яагаад хуулдаг юм бэ?
Тоохгүй харахгүй хайнга царайлавч
Тольтой яагаад ярилцаг юм бэ?
Эцсийн эцэст энэ бүхэн чинь
Инээдтэй санагдаад хөгийн байна
Эцсийн эцсийг нь үзэх гэж зарим нь
Элдвийг шалгаагаад хошин байна.
Царай шигээ сайхан сэтгэлтэй нь ч байна
Санаа шигээ муухай царайтай нь ч байна.
Хэнийг та гаднаас нь хараад
Хээв нэг тодорхойлж сууна вэ?
Хэн таныг гаднаас тань ажаад
Хэлбэрт баригдсан мунхаг гэж таних вэ?
Б.МӨНХ-ОРГИЛ
