Завхан аймгийн музейн угсаатны зүйн танхимд хадгалагдаж буй ховор үзмэрүүдийн нэг нь XVIII-XIX зууны үед холбогдох мөнгөн дөрөө юм.
Уг дөрөөг 2008 онд иргэн Б.Цолмон одоогийн Улиастай сумын нутаг дахь Сангийн хот буюу Маймаачин хотын тууриас олж, музейн сан хөмрөгт хандивласнаар үнэт олдворын бүртгэлд багтжээ.
Цагаан мөнгөөр цутган урласан, өрөөсөн сэнжтэй энэхүү дөрөөний бөөрөн хэсэг болон сэнжний хоёр талаар арслангийн дүрс сийлж, алтан утас гүйлгэн чимэглэсэн хийцтэй. 1.6 кг жинтэй, 16.5 см өндөр, 13 см өргөн хэмжээтэй уг дурсгал нь тухайн үеийн дархны ур ухаан, хийцийн нарийн ажиллагааг илтгэнэ.
Судлаачдын үзэж буйгаар, энэхүү олдвор нь XVIII-XIX зууны үеийн нийгэм, эдийн засгийн хөгжил, язгууртны хэрэглээний соёлыг харуулсан ховор жишээ юм.
Түүхэн сурвалжид тэмдэглэснээр, Улиастай хот 1733 онд Манжийн Чин гүрний үед жанжны газар, Сангийн хот болгон байгуулагдсан бөгөөд хятад худалдаачдын суурьшлын хэсгийг Маймаачин хэмээн нэрлэж байжээ. XVIII-XX зууны турш баруун Монголын улс төр, эдийн засгийн төвийн үүрэг гүйцэтгэж ирсэн тус хотын тууриас өнөө хэр нь археологийн үнэт олдворууд илэрсээр байна.
