Дорнод аймгийн Хөгжимт драмын театрын найруулагч, Б.Мөнх-Амьдралын найруулсан “Нууц тархи” цуврал киноны төгсгөлийн анги үзэгчдийн хүртээл боллоо.
Тус цувралын эхний ангиудад ялгаварлан гадуурхалт, өсвөр насныхны хайр сэтгэл, нөхөрлөлийн асуудлыг хөндсөн бол хоёрдугаар ангид бооцоот тоглоом, мансууруулах бодисын хор уршгийг олон нийтэд таниулахыг зорьсон байна.
Мөн хоёрдугаар ангид тархины гэмтэл авсан гол дүр Тэнүүний ой санамж сэргэж буй үйл явдал өрнөдөг. Харин төгсгөлийн анги “Нууц тархи-Зэвсэг” нэртэйгээр үргэлжилж үйл явдал цааш өрнөнө.
Б.Мөнх-Амьдралын хувьд орон нутгийн театрын урлагт идэвхтэй ажиллаж, олон жүжиг, киног туурвиж яваа уран бүтээлч юм. Тухайлбал, “Ярьдаг мод”, “Хортой ус” хүүхдийн жүжиг, “Нүдтэй наран тамга” жүжиг, “Лир ван”, “Учиртай гурван толгой” зэрэг олон уран бүтээл туурвиж, “Гэгээн муза” олон улсын театрын наадмын гранпри, шилдэг найруулагчийн шагнал хүртжээ.
Харин энэ удаагийн “Нууц тархи-Зэвсэг” киноны ерөнхий продюсероор жүжигчин Э.Батболд ажилласан байна.
