Монгол Улс Венецийн дүрслэх урлагийн олон улсын 61 дэх удаагийн биеннальд Үндэсний павильоноороо оролцоход бэлэн боллоо. “In Minor Keys” сэдвийн хүрээнд 2026 оны тавдугаар сарын 9-ний өдрөөс арваннэгдүгээр сарын 22-ны хооронд зохион байгуулагдах тус биеннальд Монголын уран бүтээлчид “Сүлжилдээн: Хил дамнасан холбоосууд” үзэсгэлэнгээр оролцож, нүүдэлчин соёлын гүн ухаан, түүхэн ой санамж, орчин үеийн уран сэтгэлгээний огтлолцлыг уран бүтээлээрээ дэлхийд толилуулна.
Үзэсгэлэнгийн хүрээнд Б.Номин, Г.Гэрэлхүү, Ё.Төгөлдөр, Д.Дорждэрэм нар уран зураг, видео, баримал, текстил, инсталляцийн олон төрөлт хэлбэрээр Монголын дүрслэх урлагийн өнөөгийн хөгжил, өвөрмөц өнгө төрхийг илэрхийлж оролцоно. Тэдний бүтээлүүд нь уламжлал ба орчин үе, хүн ба оршихуйн харилцаа, байгаль ба соёлын шүтэлцээг өөр өөрийн өнцгөөр тайлбарлан харуулж байна.
Монголын павильоны куратороор Ц.Уранчимэг, хамтарсан куратороор Томас Эллер ажиллаж байгаа бөгөөд олон улсын туршлага, судалгааны үндэслэлд тулгуурлан Монголын орчин үеийн дүрслэх урлагийг дэлхийн үзэгчдэд илүү өргөн хүрээнд таниулах зорилготой юм.
Монгол Улс энэхүү нэр хүндтэй биеннальд оролцох бэлтгэл ажлыг төрийн бодлогын хүрээнд зохион байгуулж, салбарын яам дэмжлэг үзүүлэхээс гадна соёл урлагийн салбарын түншлэл олон улсын хамтын ажиллагааны хүрээнд “БодьДарма сан”, “Капитрон банк”, “Волт”, “Маршал арт галерей”, “Некст натур дизайн”, “Гончигсумлаа сан”, “Броскод паблишинг” гэх зэрэг 30 гаруй байгууллага, аж ахуйн нэгж хамтран уран бүтээлчид аян замдаа гарахад бэлэн болоод байна.
