Хөвсгөл аймгийн ИТХ-ын дарга Д.Пүрэвдорж Мөрөн сумын “Авьяас” сургуулийн дүрслэх урлагийн багш Д.Нямтогтох болон холбогдох албаныхныг хүлээн авч уулзлаа.
Тухайлбал, Хөвсгөл аймгийн Түнэл сумын Цагаан толгой хэмээх газраас 2019 онд Мөрөн сумын “Авьяас” сургуулийн дүрслэх урлагийн багш Д.Нямтогтох, Д.Отгондаваа, Д.Болдсайхан нар хүрэл тогоо, сумны чулуун хэв зэрэг нэн ховор археологийн олдворуудыг илрүүлсэн байна.
Энэхүү олдворын судалгааг ШУА-ийн Археологийн хүрээлэнгийн салбарын эрхлэгч, доктор Ж.Баярсайхан, Соёлын өвийн үндэсний төвийн хэлтсийн дарга Г.Анхсанаа нар удирдан зохион байгуулж, хүрэл тогооноос авсан дээжийг Швейцар улсын Цюрихийн их сургуулийн Эртний уургийн судалгааны лабораторид шинжлүүлсэн байна.
Судалгааны үр дүнд жижиг хүрэл тогооноос 2800 жилийн өмнөх сарлагийн сүүний уураг илэрч, сарлагийг хүн төрөлхтөн анх гаршуулсан хамгийн эртний шинжлэх ухааны нотолгооны нэг болох нь тогтоогджээ.
Ингэснээр өмнө нь Төвөдийн өндөрлөгөөс олдсон 2500 жилийн настай гэж үзэж байсан баримтаас 300 орчим жилээр урагшлуулан, монголчууд 2800 жилийн өмнө сарлагийг гаршуулж байсныг шинжлэх ухааны үндэслэлтэйгээр нотолсон, дэлхийн хэмжээний ач холбогдолтой нээлт болжээ.
Өдгөө энэхүү үнэт дурсгалууд “Чингис хаан” үндэсний музейд хадгалагдаж байна.
Иргэний хариуцлагатай үйл ажиллагаа гарган энэхүү түүхэн ач холбогдолтой олдворыг илрүүлж, төрийн хамгаалалтад шилжүүлсэн үйл хэргийг нь үнэлэн Хөвсгөл аймгийн ИТХ-ын дарга Д. Пүрэвдорж “Авьяас” сургуулийн дүрслэх урлагийн багш Д.Нямтогтоход аймгийн дээд шагнал болох “Хөвсгөлийн од” медаль, батламж болон 1 сая төгрөгийн урамшууллыг гардуулж баяр хүргэлээ.
