Монгол хэмээх овог аймаг, олон зууны турш ээлж дараалан суудал солигдох их хаадынхаа сүр хүчээр улс гүрнээ байгуулж, өөр өөрийн онцлогтой дуу хуурын баялгийг бий болгон нүүдэлчин омгийнхоо түүх соёлыг айзам хэмнэл, ая дан, найруу эгшгээр илэрхийлэхдээ хөгжмийн зэмсгийн баялаг уламжлалыг бүтээж байсан нь оюун сэтгэлгээний томоохон ололт юм.
ХХ зууны хоёрдугаар хагаст Монголын нэрт хөгжмийн зохиолч Л.Мөрдорж санаачлан их найрлыг сэргээн Монголын орчин цагийн үндэсний хөгжмийн их найрал байгуулсан нь 2005 онд Монгол Улсын ерөнхийлөгчийн “Монгол төрийн Үндэсний хөгжмийн их найрал байгуулах тухай” зарлигаар өргөжин дахин сэргэсэн юм.
Энэ удаад Монгол Улсын Төрийн соёрхолт хөгжмийн зохиолчдын туурвисан Үндэсний дуу бүжгийн эрдмийн чуулгын алдарт бүтээлүүд болох бүжгийн жүжгийн хөгжмүүд, дэлхийн сонгодог болон орчин цагийн хөгжмийн бүтээл, морьтон түмний минь хүндэтгэн хайрладаг морины холбогдолтой дуунуудаас сэдэвлэсэн хөгжмийн бүтээлүүдийн яруу тансаг аялгууг та бүхэндээ өргөн барихаар боллоо.
Монгол төрийн Үндэсний хөгжмийн Их найрлын “Морьтон монголын аялгуу” нэртэй энэхүү тоглолт 9 сарын 20,21-нд 19:00 цагаас ҮДБЭЧуулгын тайзнаа тоглох товоо зарласан юм. Тэгвэл тус тоглолтын хэвлэлийн бага хурал маргааш буюу 9 сарын 18 -нд, 10 цаг 30 минутаас ҮДБЭЧуулгат болох гэж байна. Эрхэм хүндэт сэтгүүлчид та бүхнийг хүрэлцэн ирэхийг урьж байна.
www,URLAG.mn