-Таван жил хамтдаа байгаа уншигчдаа бүгдийг нь урья-
Вэбсайтуудын орчин дахь анхны төрийн бус байгууллага “Монголын Сайтын Холбоо” 5 нас хүрч байна. 2009 онд Нийслэлийн өдрөөр zaluu.com, bolod.mn, tsag.mn зэрэг сайтуудын төлөөлөлтэйгөөр анх мэндэлж байсан энэ байгууллага өнөөдөр эгнээндээ 120 гаруй вэбсайтыг нэгтгэсэн, өдөрт давхардсан тоогоор 10 сая орчим хандалттай хамгийн их хэрэглэгчид, уншигчтай, өдөртөө давхардсан тоогоор 12000 гаруй мэдээллийн урсгалтай Монголын хамгийн хүчирхэг мэдээллийн талбар болж өргөжлөө.
Энэ бол цаг үеэ дагаж мэдээллийн технологийг ашиглаж, мэдээ мэдээллээ цаг алдалгүй авч, хэрэглэж дадсан уншигч, хэрэглэгчдийн маань том ололт төдийгүй энэ салбарт ажиллаж, хийж бүтээж байгаа сэтгүүлч, сурвалжлагчид, мэдээллийн технологийн болоод сүлжээний инженер техникийн ажилтнуудын хийж бүтээсний бахархал юм.
Иймд бид уншигч, хэрэглэгчиддээ 5 жилийн ойгоороо талархснаа илэрхийлэн рок поп, хип хоп, амьд хөгжмийн оддын нэгдсэн шоу тоглолтоор үнэгүй бэлэг барьж байгаа билээ. Бидний бэлэг 9 дүгээр сарын 24-ний энэ өдөр Чингисийн талбайд задарна. Тэнд хотлоороо хуран чуулж, хамтдаа нэг өдрийг өнгөрүүлж энэ намрын хамгийн том шоуг хамтдаа үзэж, хамтдаа дуулж хуурдаж доргиж өнгөрүүлцгээхийг хүсч байна.
Найз нөхдөөрөө, гэр бүлээрээ Их эзэн Чингисийнхээ талбайд хуран чуулж таван жилийн ой нь тохиож буй Монголын Сайтын Холбоо болон Urlag.mn вэбсайт, Uvertura хамтлагийн талархлын баярт уншигч таныг гүнээ хүндэтгэн Их эзэн Чингис хааны талбайд урьж байна.
Монголын Сайтын Холбооны Ерөнхийлөгч Ж.Жаргалсайхан
