Архангай аймагт эртний хүмүүсийн амьдрал, зан заншил, оюун санааны хөгжлийг харуулах түүх, соёлын олон дурсгал бий. Тэдгээрийн нэг нь хүрэл зэвсгийн үеийн хүмүүсийн үлдээсэн хадны зураг юм.
Архангай аймгийн түүх, соёлын дурсгалуудыг хадны зураг, бичээс, булш, хиргисүүр, оршуулга, тахилын байгууламж, эртний хот суурин, сүм хийдийн үлдэгдэл, архитектурын дурсгал, хөшөө дурсгал гэсэн дөрвөн бүлэгт ангилдаг байна.
Хүрэл зэвсгийн үеийн хадны зургийг дүрслэлийн аргаас нь хамааруулан улаан зосон болон сийлмэл зураг гэж ангилдаг. Энэ үеийн хүмүүсийн үлдээсэн хадны сийлмэл зураг нь тухайн үеийн овог, аймгийнхны оюун санааг танин мэдэхэд чухал дурсгалд тооцогддог.
Архангай аймгийн нутагт улаан зосон зургийн дурсгал Өлзийт сумын Гацааны хад, Хүрэн мандал, Өндөр-Улаан сумын Дөрөө хангинах, Тариат сумын Бунхантын хад зэрэг газарт бий.
Харин сийлмэл зургийн дурсгал Батцэнгэл сумын Их үнэгдэй, Булган сумын Дэл хад, Мараат, Жаргалант сумын Бугатын ам, Улиастайн гол, Их Тамир сумын Хөрөөгийн үзүүр, Өлзийт сумын Өндөр толгой, Янгирт, Тариат сумын Чулуутын гол, Бунхантын ам, Цэцэрлэг сумын Өвгөн хонгоржин уул, Хүрэмт зэрэг газарт байдаг.
