Ахмад Америк дүрээрээ дэлхийд танигдсан жүжигчин Энтони Макки өсвөр насандаа дислекси буюу унших, бичих чадварт нөлөөлдөг суралцахуйн онцлогийн улмаас сургуульдаа бусад сурагч, багш нарын зүгээс найдваргүй нэгэн мэт үнэлэгддэг байснаа ярьжээ. Харин есдүгээр ангид нь хичээл зааж байсан нэгэн багш түүнийг Уильям Шекспирийн бүтээлүүдтэй танилцуулж, амьдралынх нь замыг өөрчилсөн байна.
Макки энэ тухайгаа “People” сэтгүүлд өгсөн ярилцлагадаа дурджээ. Тэрбээр “Би дислекситэй гэдгээ өөрөө ч мэддэггүй байсан. Үүнээс болж олон сурагч, багш намайг аль хэдийн найдваргүй гэж үздэг байлаа” хэмээн ярьсан байна. Түүний хэлснээр, есдүгээр ангийн нэгэн багш нь уншиж, ойлгоход хүндрэлтэй байсан ч түүнд цаг гарган тусалж, Норвегийн жүжгийн зохиолч Хенрик Ибсен, Оросын зохиолч Антон Чехов болон Шекспирийн бүтээлүүдийг хамтдаа судалдаг байжээ. “Тэр багш надад Уильям Шекспирийг танилцуулсан. Бичсэн зүйлийг уншиж, ойлгох надад хэчнээн хэцүү байсан ч тэр тэвчээртэйгээр тусалж, хамтдаа олон бүтээл уншсан. Тэр хүн өнөөдрийг хүртэл миний найз хэвээрээ байгаа” хэмээн Макки дурсжээ.
Өдгөө 48 настай жүжигчин 2027 оны хавар Бродвейн тайзнаа Уильям Шекспирийн “Макбет” жүжгийн гол дүрд тоглохоор болжээ. Макки 2003 онд “Ma Rainey’s Black Bottom” жүжгээр Бродвейд анх тоглож, 2010 онд “A Behanding in Spokane” жүжигт хамгийн сүүлд оролцсон байна. Тэрбээр 35 жилийн өмнө өсвөр насандаа Шекспирийн бүтээлтэй танилцаж байсан бол өдгөө Бродвейн тайзнаа түүний жүжгийн гол дүрийг бүтээх гэж буйдаа талархаж байгаагаа илэрхийлжээ. “35 жилийн дараа Бродвейн тайзан дээр Шекспирийн жүжигт тоглох боломж олдсоныг мэдэрч буй сэтгэл хөдлөл, талархал, амжилтыг үгээр илэрхийлэх аргагүй” хэмээн тэрбээр ярьсан байна.
Түүнчлэн Макки удахгүй “Exoplanet” нэртэй шинжлэх ухааны уран зөгнөлт аудио бүтээлд дуу оруулна. Энэхүү бүтээлд Ариана Дебоз, Жон Легуизамо нар түүнтэй хамтран ажилласан бөгөөд арваннэгдүгээр сарын 5-нд “Audible” платформоор нээлтээ хийх юм.
