Холливудын нэрт жүжигчин Дастин Хоффман 1967 онд дэлгэцнээ гарсан “The Graduate” киноны зураг авалтын үеэр өөртөө итгэлгүй болж, найруулагч Майк Николсын хандлагаас болж ихээхэн дарамт мэдэрч байсан тухайгаа ярьжээ. Тэрбээр уг киног өөрийн амьдралыг өөрчилсөн бүтээл хэмээн хүлээн зөвшөөрөхийн зэрэгцээ зураг авалтын үйл явцыг “аймшигтай туршлага” байсан гэж тодорхойлсон байна.
Хоффман энэхүү дурсамжаа удахгүй хэвлэгдэх “Look at Me” хэмээх намтар номдоо бичжээ. Түүний дурсамжаас сэдэвлэсэн эсээ “The New Yorker” сэтгүүлд нийтлэгдсэн байна.
Жүжигчин уг киноны гол дүр Бенжамин Брэддокийн дүрд тоглохдоо өөрийгөө тохирохгүй гэж бодож байжээ. Учир нь зохиолын дүр нь чинээлэг америк гэр бүлээс гаралтай, сурлага сайтай, спортын авьяастай залуу байсан бол Хоффман өөрийн төрх, гарал үүслээс шалтгаалан энэ дүрд тохирох эсэхдээ эргэлзэж байв.
Найруулагч Майк Николс түүнийг дүрд сонгосон ч зураг авалт эхэлсний дараа харилцаа нь өөрчлөгдсөн гэж Хоффман дурсжээ. Түүний хэлснээр Николс бэлтгэл сургуулилтын үеэр найрсаг байсан боловч зураг авалтын талбай дээр уур уцаартай, хатуу ханддаг болж, жүжигчин өөрийгөө ажлаас халагдах гэж байна хэмээн байнга болгоомжилдог байжээ.
Тэрбээр мөн киноны нэгэн хэсгийн зураг авалтын үеэр хамтран тоглосон жүжигчин Кэтрин Росс өөрийг нь 27 удаа алгадсан тухай ярьсан байна. Найруулагч Николс тухайн хэсгийг дахин дахин авахыг шаардаж, Росст илүү хүчтэй алгадахыг хэлж байсан аж. Хоффман зураг авалтын төгсгөлд толгой нь эргэсэн бөгөөд эцэст нь уг алгадалтын хэсгийг кинонд ашиглаагүй гэнэ.
Маргааш нь усан доорх зураг авалтын үеэр чихнээс нь цус гарч байсныг жүжигчин дурсжээ. Тэрбээр өмнөх өдрийн алгадалт болон усан доорх даралтын улмаас чихний хэнгэрэг нь цоорсон гэж бичсэн байна.
Гэсэн ч “The Graduate” кино Хоффманы жүжигчний замналд томоохон эргэлт авчирсан бүтээл болжээ. Тэрбээр уг кинонд Бенжамин Брэддокийн дүрийг бүтээсэн бол Энн Бэнкрофт, Кэтрин Росс нар гол дүрүүдэд тоглосон юм. Кино долоон төрөлд “Оскар”-ын шагналд нэр дэвшиж, найруулагч Майк Николс шилдэг найруулагчийн шагнал хүртсэн байна.
Дастин Хоффманы “Look at Me” намтар ном 2026 оны арваннэгдүгээр сарын 10-нд хэвлэгдэн гарахаар товлогджээ.
