Америкийн рок дуучин, хөгжимчин Ленни Кравиц Флорида мужид есөн хүний амь нас хохирсон “Learjet 60” онгоцны осолд өртсөн гэх мэдээллийг түүний хэвлэлийн төлөөлөгч няцаалаа. Тэрбээр цахим орчинд тархсан уг мэдээллийг “худал бөгөөд үндэслэлгүй” хэмээн мэдэгджээ.
Тус онгоц 2026 оны арваннэгдүгээр сарын 1-нд Техас мужийн Остин хотоос Багамын арлуудыг зорин ниссэн боловч Флорида мужийн Палм-Бич орчмын суурьшлын бүсэд осолдсон байна. Онгоцонд зорчиж явсан есөн хүн бүгд амь үрэгджээ. Ослын шалтгааныг холбогдох байгууллагууд шалгаж байгаа аж.
Кравиц осолдсон онгоцонд байсан гэх цуурхал цахим сүлжээнд тархсан нисгэгчийн тухай мэдээллээс үүдэлтэй байна. Тодруулбал, Эмили Шелтон гэх нисгэгч өмнө нь Кравицыг Техасын Остин хотоос Багамын арлууд руу нисгэх гэж буйгаа олон нийтийн сүлжээнд нийтэлсэн гэх зураг дэлгэрчээ. Үүний дараа зарим хэрэглэгч түүнийг осолдсон онгоцны нисгэгч, харин Кравицыг зорчигчдын нэг байсан хэмээн таамагласан байна.
Гэвч Шелтон өөрөө осолдсон нислэгийн нисгэгч байгаагүй гэдгээ мэдэгдэж, худал мэдээлэл тараахгүй байхыг олон нийтээс хүсжээ. Тэрбээр мөн ослоор амиа алдсан хүмүүс болон тэдний ар гэрийнхэнд эмгэнэл илэрхийлсэн байна.
Харин Кравицын хэвлэлийн төлөөлөгч Карлин Донован дуучин уг онгоцонд байгаагүйг баталж, цуурхлыг эрс няцаасан байна.
Одоогоор ослын шалтгааныг АНУ-ын Үндэсний тээврийн аюулгүй байдлын зөвлөл (NTSB) шалгаж байгаа бөгөөд мөрдөн шалгах ажиллагаа үргэлжилж байна.
