“Sex and the City” цувралын Миранда Хоббсын дүрээрээ алдаршсан жүжигчин Синтия Никсон “And Just Like That” цуврал дахь дүрийнхээ өөрчлөлтүүдэд дуртай байдгаа илэрхийлжээ. Хэдийгээр үзэгчдийн зарим нь Мирандагийн шинэ төрх, амьдралын сонголтуудыг таагүй хүлээж авсан ч жүжигчин үүнийг дүрийн сонирхолтой талуудын нэг гэж үздэг байна.
Никсон “The New York Times” сонинд өгсөн ярилцлагадаа “Үзэгчид Мирандагийн гунигтай байдал, архины хамааралтай болсон нь болон нас ахисан хойноо нийгмийн дэвшилтэт үзэлтэй хүн болох гэж эв хавгүй оролдож байгаад нь ихэд цочирдсон. Харин надад энэ бүхэн маш их таалагдсан” хэмээн ярьжээ.
HBO-ийн алдарт “Sex and the City” цувралын үргэлжлэл болох “And Just Like That” бүтээлд Мирандагийн амьдралд томоохон өөрчлөлтүүд гардаг.
Өдгөө Синтия Никсон HBO-ийн “The Gilded Age” түүхэн драмын цувралд Ада Фортегийн дүрийг бүтээж байгаа бөгөөд тус бүтээлийн дөрөвдүгээр улирал нээлтээ хийсэн байна.
Гэсэн хэдий ч жүжигчний хэлснээр Миранда Хоббсын дүр түүний бусад олон уран бүтээлээс илүүтэйгээр үзэгчдийн ой тойнд үлдсэн хэвээр байгаа аж. “Sex and the City” цуврал 2004 онд дууссанаас хойш 22 жил өнгөрсөн ч үзэгчид түүнийг Мирандагийн дүрээр нь таньсаар байна.
