XIII-XIV зууны монгол хүн чулууны хэв шинжийг бүрэн илэрхийлсэн уран нарийн хийцлэлтэй “Шивээтийн хүн чулуун хөргүүд” нь Сүхбаатар аймгийн Онгон сумын төвөөс баруун урагш, Шивээтийн гурван овоо хэмээх намхан ухаа дээр байрладаг. Баруунаас зүүн хойш чиглэлд цуварсан эдгээр гурван хөшөө хоорондоо зайтай оршдог.
Эдгээр хүн чулуун хөшөөг 1981 онд анх илрүүлжээ. Хөшөө тус бүр чулуун байгууламжтай бөгөөд шаргал боржин, саарал гантиг зэрэг гурван төрлийн чулуугаар урласан байна.
“Шивээтийн хүн чулуун хөргүүд” нь хийцлэл, дүрслэлийн хувьд өөр өөрийн онцлогтой. Хөшөөнүүдэд ихэс дээдсийг хаан сэнтийд заларсан байдлаар дүрсэлжээ. Тэд бадамлянхуа цэцгэн хээтэй сэнтийд сууж, хүннү захтай, хормойгоо хээгээр чимэглэсэн хувцас өмссөн байна. Мөн цэцгэн товруут бүс бүсэлж, бөмбөгөр оройтой, ардаа богино залаатай малгай өмссөн бөгөөд малгайн ширээсийг шувууны өдөөр чимэглэжээ. Зүүн ташаандаа дөрвөлжин хэлбэртэй хавтага, хутга, сэтгүүрийг давхардуулан унжуулсан байдлаар урласан байна.
Нүүрний төрх, уруул, нүд, гарын хуруу, хумс болон гартаа барьсан эрхи зэргийг нарийн урласан нь тухайн үеийн урчуудын ур чадвар өндөр байсныг илтгэнэ.

