Испанийн алдарт дуучин Хулио Иглесиастай холбоотой бэлгийн дарамт, хүчирхийллийн хэрэгт Испанийн Үндэсний шүүх шалгалт эхлүүлжээ. Түүнийг гэрийнх нь эдлэнд ажиллаж байсан хоёр эмэгтэйд бэлгийн дарамт үзүүлж, бие махбодын халдлага үйлдсэн хэмээн буруутгаж байгаа юм.
Гомдол гаргасан эмэгтэйчүүдийн нэг нь гэрийн үйлчлэгч, нөгөө нь физик эмчилгээний мэргэжилтэн бөгөөд 2021 онд дуучны Доминикан болон Багамын арлууд дахь хувийн эдлэнд ажиллаж байхдаа дарамт, доромжлолд өртсөн гэж мэдүүлжээ.
Тэдний мэдүүлэгт Хулио Иглесиас биед нь зөвшөөрөлгүй хүрэх, бэлгийн шинжтэй дарамт үзүүлэх, бие махбодын халдлага үйлдэхээс гадна сэтгэл санааны дарамт, доромжлол учруулдаг байсан тухай дурдсан байна. Мөн нэг эмэгтэйн биед үүссэн хөхрөлт болон хазуулсан байж болзошгүй ул мөрийн гэрэл зургууд нотлох баримтын хүрээнд яригджээ.
Испанийн шүүх гомдол болон холбогдох материалыг урьдчилан шалгасны дараа эрүүгийн хэрэгт мөрдөн шалгах ажиллагаа эхлүүлэхээр шийдвэрлэсэн байна. Гэхдээ энэ нь дуучны гэм бурууг тогтоосон эцсийн шийдвэр биш бөгөөд хэргийг үргэлжлүүлэн шалгах шаардлагатай гэж үзжээ.
Хулио Иглесиас нь алдарт дуучин Энрике Иглесиасийн аав бөгөөд дэлхий даяар 300 сая гаруй пянз, цомог борлуулсан, испани хэлт хөгжмийн ертөнцийн хамгийн алдартай уран бүтээлчдийн нэг юм. Түүний “To All the Girls I’ve Loved Before”, “Me Olvidé de Vivir”, “Hey!” зэрэг дуунууд олон улсын хит болсон билээ.

