АНУ- ын "The Pollock – Krasner Foundation" сан Монголын зураач Б.Номинд уран бүтээлчийн тэтгэлэг болох 20 мянган долларыг олгохоор болсон байна. Энэхүү мэдээллээ тэд олон нийтэд өчигдөр зарлав. Алдарт зураач абстракт экспрессионизмын гол төлөөлөгч Жэксон Поллок болон түүний эхнэр, Зураач Ли Краснерын нэрээр нэрлэгдсэн уг санг Краснер уран бүтээлчдийн санхүүгийн асуудалд дэмжлэг үзүүлэх зорилгоор 1985 онд анх байгуулагдсан аж.
Энэ хугацаанд 76 орны 4,000 гаруй уран бүтээлчид нийт 62 сая долларын тэтгэлэг олгосон байна. Энэ жил Монголоос анх удаа уран бүтээлч шалгарсан нь энэ. Зураач Б.Номингийн хувьд ДУДС-ын Монгол зургийн ангийг 2005 онд суралцаж төгссөн.
Түүний бүтээлүүдээс харвал нүд булаам. Мөн Монгол хүний тухай ойлголт, өдрөөс өдөрт алдагдаж байгаа уламжлал соёлын асуудлууд нь түүний уран бүтээлийн гол сэдэв болдог бөгөөд уламжлалт зургийн аргаар орчин цагийн нийгэм, амьдралын тухай хүүрнэн өгүүлдэг.
