Монголд бүтэн жилийн хур тунадасны 80-90 хувь нь зун, ялангуяа долоодугаар сард унадаг. Долоодугаар сарын хур тунадасны олон жилийн дунджийг харвал энэ жил төдий л өөрчлөгдөөгүй байгаа аж. Гэхдээ энэ жил хур тунадас газар нутаг бүрт өөр байгаа гэнэ.
Тухайлбал, энэ сард Орхон аймагт 12 цагийн дотор 90 мм бороо орсон нь олон жилийн дунджаас нэлээд өндөр үзүүлэлт аж. Тус аймагт 1985 оны долоодугаар сарын 25-нд хоногт 69.3 мм бороо орж байсан түүхтэй юм байна. Түүнчлэн долоодугаар сард тус аймагт хамгийн ихдээ 103.6 мм тунадас орсон байдаг. Гэтэл одоогоор 194 мм тунадас уначихаад байгаа аж.
Мөн энэ сард Булган, Сэлэнгэ, Төв зэрэг төвийн аймгийн болон зүүн аймгуудын хойд хэсгээр олон жилийн дунджаас ахиу бороо орох нөхцөл бүрдчихээд байгаа гэнэ. Түүнчлэн долдугаар сараас хойш бороо тасралтгүй орж байна. Энэ долоо хоногт ч орох тухай цаг уурчид хэлж байна.
Өнгөрсөн даваа гаригт төвийн аймгаар орж байсан бороо зүүн тийш шилжиж, мягмар гаригт зүүн аймгуудаар ороод манай орноос цаашилжээ. Гэтэл өчигдөр баруун зүгээс дахин борооны үүл наашилж байгаа гэнэ. Тиймээс 19-нд нутгийн төв хэсгээр, 20-нд зүүн хэсгээр бороо үргэлжилнэ. Түүнчлэн ирэх ням гаригаас нутгийн хойд хэсгээр бороо орно. Ер нь энэ сарыг дуустал, ялангуяа нутгийн хойд хэсгээр бороо орох төлөвтэй байгаа юм байна.
