Дуурь бүжгийн эрдмийн театрын уран бүтээлчид долоодугаар сарын 1-нд А.Аданы “Жизель”-ээр хөшгөө хаасан бол шинэ улирлын тоглолтын сураг өнөөдрөөс чих дэлслээ. Ягаан театр энэ улирлын нээлтээ аравдугаар сарын 6, 7-нд И.Чайковскийн “Евгений Онегин” дуурь, А.Хачатуряны “Спартак” балетаар хийх гэнэ. Тус театр 1963 онд бие даасан байгууллага болж, нээлтээ П.И.Чайковскийн “Евгений Онегин” дууриар хийсэн түүхтэй.
Тэр үед тоглолтыг төрийн шагналт Ж.Чулуун удирдаж, Д.Лхасүрэн найруулсан юм билээ. Үүнээс хойш уг дуурийг хоёр удаа шинэчлэн найруулж байжээ. Өнгөрсөн улиралд ч театрынхан 1988 оны найруулгаараа “Евгений Онегин”-ийг тайзнаа амилуулсан нь амжилттай болж, үзэгчдийн талархлыг хүлээсэн юм. Сонгодог урлагийн фэнүүдийн мөрөөдөл болсон нэрт зохиолч А.Хачатуряны “Спартак” балетийг тус театрын шинэ улирлын нээлтийн хоёр дахь өдөр үзэх боломжтой.
Энэ оны хоёрдугаар сард “Төгөлдөр” сангийн тэтгэлгээр “Спартак”-ийг тайзнаа дахин амилуулсан. Балетийг Монгол Улсын Төрийн шагналт, Хөдөлмөрийн баатар Б.Жамъяндагва дэглэн, 1984 онд ДБЭТ-ын тайзнаа тавьж байсан ба гол дүрд Ю.Оюун, О.Ганбаатар, О.Батсайхан, Х.Гэрэлчимэг нар бүжиглэжээ.
