УДЭТ-ын захирал, Төрийн соёрхолт, Урлагийн гавьяат зүтгэлтэн, найруулагч Н.Наранбаатар жүжигчний хувиар тайзнаа эргэн гарах гэж байна. Тодруулбал, УДЭТ 96 дахь үзвэрийн жилийн нээлтээ Оросын нэрт зохиолч, драматург Михаил Рощины зохиол “Валентин, Валентина хоёр” жүжгээс сэдэвлэсэн саунд драмыг аравдугаар сарын 13-наас хийнэ.
Тэгвэл эл уран бүтээлд Н.Наранбаатар “Танихгүй хүн” гэх дүрээр тайзнаа гарахаар болжээ.
“Валентин, Валентина хоёр” саунд драмд хайр, дурлал, хүний сэтгэлийн нандин мэдрэмжийн тухай өгүүлэх бөгөөд УДЭТ-ын залуу найруулагч Э.Билгүүн шинэ өнгө төрхтэйгөөр үзэгчдэд хүргэх юм.
Н.Наранбаатар нь 1998 онд Соёл урлагийн их сургуулийг жүжигчин, найруулагчийн мэргэжлээр төгссөн бөгөөд 2000 оноос Улсын драмын эрдмийн театрт жүжигчин, найруулагчаар ажиллаж эхэлжээ.
Тэрбээр УДЭТ-ын тайзнаа Т.Вертенбекрийн “Манай сайхан эх орон” жүжгийн Ральф, Д.Равжаагийн “Саран хөхөө” жүжгийн түшмэл Дарма, Ф.Шиллерийн “Хар санаа хайр сэтгэл” жүжгийн Фердинанд, Р.Ганбатын “Эрлэгийн данс” жүжгийн Очир зэрэг дүрүүдийг бүтээснээс гадна 2000 онд Б.Батбаярын “Бооцоо” жүжгийг найруулснаар найруулагчийн гараагаа эхэлжээ. Тэрбээр өнөөдрийг хүртэл “Надаар тоглосон хайр”, “Жаргах гэж дурладаг уу”, “Чи минийх”, “Дурлахыг хориглоно”, “Шөнө амталсан нулимс”, “Нууц амраг чинь болъё”, “Төлөөс”, “Нэргүй од”, “Парисын дарь эхийн сүм”, “Би ч гэсэн жаргамаар байна”, “Гамлет”, “Ромео, Жульетта”, “Анна Каренина”, “Тэнгэрийн хүү” гэхчилэн 40 гаруй жүжгийг тайзнаа найруулан тавьжээ.
