ОХУ-д суугаа манай элчин сайд Д.Идэвхтэн Оросын зохиолч Виктор Слипенчукт Чингисийн одон гардуулжээ. Одон гардуулахдаа тэрбээр “Улс орны хөгжилд оруулсан чин сэтгэлийн хувь нэмэр, монгол үндэсний уламжлал ёс заншлыг сэргээн хадгалах, нүүдлийн соёл иргэншлийг хамгаалахын төлөө гаргасан нөр хөдөлмөр”-ийг нь үнэлж байгаагаа онцлон тэмдэглэсэн байна. В.Слипенчук нь Чингис хаан, Дундад зууны монголчуудыг магтан сайшаахыг коммунист дэглэм хүлцдэггүй байсан тэртээх 1964 онд “Чингис хаан” хэмээх найраглал бичсэн хүн юм. Тухайн үед тэрбээр армид алба хааж байсан бөгөөд хуягт танкийн батальонд бага дарга цолтой байжээ. Чингис хааныг магтан дуулсан бүтээлийг хэвлэх нь байтугай зохиогчийг нь хавчин хяхдаг байсан цаг тул тэрбээр нооргоор нь хадгалж явсаар нэг мэдэхэд үрэгдүүлсэн байсан гэнэ. Гэвч В.Слипенчук бүхэл бүтэн 47 жилийн дараа буюу өнгөрсөн онд бүтээлээ олсон байна. Гэхдээ эх ноорог нь биш, хэн нэгний гараар хуулсан хувилбар олджээ. 1964 онд түүнтэй хамт алба хааж байсан зураач Петр Кириллов найраглалд зураг чимэг үйлдсэн нь мөн олдсон бөгөөд зохиогч Францын Канн хотод байхдаа нэмж засварлан Оросын “Аргументы и факты” сонинд анх хэвлүүлж улмаар Москвагийн “Городец” хэвлэлийн газар ном болгон гаргасан байна. Мөн өнгөрсөн оны гуравдугаар сард “Оросын радио”, “Чингис хаан” найраглалыг радиод зориулан найруулж эфирээрээ нэвтрүүлсэн бөгөөд текстийг нь ОХУ-ын гавъяат жүжигчин Владимир Левашев уншжээ.
В.Слипенчук нь яруу найрагч төдийгүй тууж, найруулал, өгүүллэгийн олон арван ном хэвлүүлсэн нэртэй зохиолч юм. Түүний зохиолууд ОХУ төдийгүй Украин, Серб, Япон, Хятад, Вьетнам зэрэг 10 гаруй оронд хэвлэгджээ. Цэргийн алба хаасныхаа дараа геологич, зоотехникч, далайчин, загасчин, мужаан, барилгачин зэрэг өдий төдий ажил хийж явсан бөгөөд туулсан баялаг амьдралдаа үзэж харсан зүйлээ уран сайхнаар өгүүлсэн зохиолууд нь уншигчдын сонирхлыг ихээр татдаг байна.
Б.АМГАЛАН
Эх сурвалж: "ӨДРИЙН ШУУДАН" сонин
