Тулгар төр байгуулагдсаны 2222, Их Монгол Улс байгуулагдсаны 807, Ардын хувьсгалын 92 жилийн ойн Говь-Алтай аймгийн баяр наадмын нээлт сайхан боллоо. Алтай нутгийн баяр наадмыг Говь-Алтай аймгийн засаг дарга Ш.Амгаланбаяр үг хэллээ. Тэрбээр:
-Говь-Алтай аймгийн баяр наадмын өмнөхөн тэнгэр дулаарч, шимт хур бууж, газар дэлхий дэлгэрч, сайхан зун айлчилж, малын зоо тэнийн, хүн зоны сэтгэл амар жимэр аятай тухтай байгаа энэ үед уламжлалт баяр наадмаа тэмдэглэж байгааг онцолсон юм. Мөн аймгийнхаа нийт ард иргэддээ эрүүл энх аз жаргалтай байж, эрхэлсэн хөдөлмөр зорьсон үйлсдээ амжилт гаргахын өлзийтэй ерөөлийг өргөн дэвшүүлж, баяр наадмыг нээсэн байна.
Мөн Иргэдийн төлөөлөгчдийн хурлын шийдвэрээр мазаалайг аймгийн бахархалт амьтнаар зарлаж байгаагаа мэдэгдлээ.
Ажил, амьдралын эрхээр төрөлх нутгаасаа хол яваа Алтайчуудынхаа мэнд болгон, доорх шүлгийг хүргэж байна.
Тэнгэр титимлэсэн цаст оргил ширтэн сүр жавхлан өвлөсөн Алтайн хүү
Тэлмэн зэрэглээнд хууртан бодлогоширч, уран сэтгэмж өвлөсөн Говийн хүү
Тэмээн жингийн цуваа дагаж, өлчиршсөн наран туяалан жаргах зүгийн хүү
Тэвчээр хадсан дулаан шаргал элсэн дээр тоглож өссөн Засагт ханы хөх Монгол
Бурхан буудай уулаа сүслэн ирээдүйгээ даатган хийморь нэмдэг
Бэлийх нь өнгөт цэцгэн цоморлигоос хайр өвөрлөж зүрхээ мэдэрдэг
Бүүвэйн дууны эгшиг ботгон нүдэн нулимс мэдэрч уярахуй өвөрлөдөг
Бууж мордсон түмэн эргэж сангалздаг зүрхэн шивнээ Говь Алтайн хүү
Говийн баавгай мазаалайгаа ажиглан гэгээн хайрын мөн чанарт суралцсан
Гоёмсог баян бүрд элсэн дунд сүндэрлэснийг бахдан үзэмж мэдэрсэн
Гаслан халуун элсэн дунд ус чандмань эрдэнэ гэж эх орны эд бүрийг хайрлахуй өвөртөлсөн
Гэгэлзэх сэтгэлийн гэгээн бодрол гэнэхэн насны цагаан дурсамжийн өлгий нутаг
Үүл эмжсэн Сутайн мөнх цаст оргил нь ухаан тэлж бодол уужуулсан
Үндэс угсаа цус цавэр байхын учирыг өвгөдийн сургаалиас ухаарж ойлгосон
Үлгэр домог сонсон өсөхдөө үнэнч шудрагуйн үндэсийг ухаж тунгаасан
Үүлс дунд ноён ориглууд нь сувдран байдаг гар зөв зүг дахь нутгийн эзэн
Ээж хайрхан, Эрээн нуураа дээдлэн хүндэлж нутгаа манасан зоны угсаа
Элгэн түмнээ өмөөрөн огшсон Монгол омголон зүрх
Эжийнхээ санчиган буурал нэмснийг хараад хайлан бодлогоширсон эгэл хөвгүүн
Эх орны баруун хэлд харуулд зогсох эр хүн
Шүлгийг my_universe.blog.gogo.mn блогоос авлаа.
Цаст Сутай хайрхнаараа овоглосон Алтай нутгийн ард түмэн минь сайхан наадаарай.
