Дэлхийн сонгодог урлагт Уильям Шекспирийн дайтай үнэлэгддэг гэх Английн инээдмийн жүжгийн алдарт зохиолч Рэй Куни болон Ж.Чэпмэн нарын “Ор хөнжил ба ноёд хатагтай” зохиолыг Н.Наранбаатар найруулагч Монголын тайзнаа тавих гэж байна.
Ингэхдээ “Эцсийн зогсоол зөвхөн чи” нэртэйгээр Монголын үзэгчдэд хүргэх бөгөөд есдүгээр сарын 20-нд нээлтээ хийх аж.
Жүжгийн ерөнхий зураачаар Т.Ганхуяг, бүжиг дэглээчээр Г.Ган-Очир ажилласан бол гол дүрд Гавьяат жүжигчин Ж.Оюундарь, жүжигчин Т.Хулан, Л.Дэмидбаатар нар, дүрүүдэд С.Сарантуяа, Б.Отгонбат, Д.Баттөмөр, Ц.Цэрэнболд, Ц.Баясгалан, Ц.Төмөрхуяг, Г.Отгонцэцэг, Д.Ганцэцэг, Б.Тамир, М.Тогтохжаргал, Б.Одончимэг болон театрын залуу уран бүтээлчид оролцон тоглох юм байна.
Энэхүү жүжиг нь 3-4 цаг үргэлжлэх томоохон бүтээл бөгөөд нэгэн гэр бүлийн амьдрал, эхнэр, нөхрийн хууралт гэхчлэн өнөөдрийн нийгэмд амьдарч байгаа хүмүүсийн мэдэх энгийн зүйлийн тухай өгүүлэх ажээ. Гэр бүл салалт нэмэгдэж, гэр бүлийн үнэ цэнэ алдагдаж байгаа нь нийгэмд ямар хор уршигтайг залуучуудад ойлгуулах зорилготой энэ жүжгийн гол өгүүлэмж нь амьдралын эцсийн зогсоол бол зөвхөн гэр бүл гэсэн санааг харуулахаараа онцлог юм.
www.URLAG.mn
