Хэдхэн хоногийн өмнө болсон Монголын Зохиолчдын Эвлэлийн XV их чуулганаас шинээр сонгогдсон Удирдах зөвлөлийн гишүүд өчигдөр буюу буюу есдүгээр сарын 26-ны өдөр анхны хуралдаанаа хийсэн байна.
Тус хуралдаанаар МЗЭ-ээс дөрвөн жилд хийх ажлын хөтөлбөрийг хэлэлцэж, мөн МЗЭ-ийн гүйцэтгэх захирлыг томилжээ. Ирэх дөрвөн жилд хийгдэхээр тусгасан ажлын эхний хэлэлцүүлгээр МЗЭ-ийн веб сайтыг шинэчлэн сайжруулах, мэдээ мэдээллийн хувьд тогтворжуулж гишүүдийнхээ уран бүтээлийг тогтвортой нийтлэж сурталчлах, МЗЭ-ийн эрдэм шинжилгээний хурлын тэнхимийг шинээр байгуулах, уран зохиолын номын дэлгүүр нээх, МЗЭ-ийн төв хэвлэл “Цог” сэтгүүл, “Утга зохиол урлаг” сонины менежментийг сайжруулах, гишүүдийнхээ ном бүтээлийг хэвлэх үйлдвэрүүдэд хөнгөлттэй хэвлүүлэх, хэвлэх эрхийг худалдан борлуулахад зуучлалын арга хэмжээг зохион байгуулах, залуу уран бүтээлчдийг дэмжих зорилгоор “Нээлттэй хаалганы өдөр”-ийг сэргээх, уншигч-зохиолчдын уулзалтыг сэргээн тогтмолжуулах зэрэг олон ажлыг хэлэлцсэн байна.
МЗЭ-ийн дүрмэнд гүйцэтгэх захирлыг нэг удаа улируулан сонгох заалт байдаг бөгөөд уг заалтын дагуу гүйцэтгэх захирал Г.Мөнхцэцэгийг улируулан сонгуулахаар Удирдах зөвлөлийн дарга санал оруулсан байна. Ингээд нууц санал хураалт явуулахад хуралдаанд оролцсон гишүүдийн 100% -ийн саналаар яруу найрагч Г.Мөнхцэцэгийг МЗЭ-ийн гүйцэтгэх захиралаар улираан сонгохоор болсон байна. Мөн энэ өдөр МЗЭ-ийн Хяналтын зөвлөл бүрэн бүрэлдэхүүнээрээ хуралдан шинэчилсэн журмаа баталж хийх ажлуудынхаа чиг үүргийг тодорхойлон ажил хүлээлцэх комисс байгуулжээ.
www.URLAG.mn
