Гундуухан намрыг гунигтайгаа үдэж хуруун дахь сүйн бөгжөө харахдаа
Гил хархан гэзэгнээс чинь үнэртэх тэр л үнэрийг сэтгэлдээ мэдрэн сууна
Гэм хийгээгүй чинийхээ хайранд баллуурдаж болохгүй хир үлдээсэн ч
Гараа дэлгэн хүлээн авсан сайхан сэтгэлийн чинь өмнө би сөхөрч байна
Ашиглах сэтгэлээр хуурамч хайрласан сэтгэлийг минь чи хараагүй
Амин хувиа хичээсэн намайг харин ойлгосон тэвчээрийн хатан минь
Аашилж чамдаа муухай зан гаргасан өдрүүдээсээ уучлалт гуйж мэхийе
Араас минь тэврээд тавиагүй чинийхээ сэтгэлийг одоо л ойлгож байна
Хайрлаж байсан сэтгэлд чинь хар толбо үлдээсэн арчаагүй залуу би
Харамсаж халаглаад сэтгэлдээ харуусаж байгаад итгээрэй амраг минь
Халамж хайрандаа өлгийдөн уучилсан чамаараа бахархаад барахгүй нь
Харин чамайгаа гомдоосон миний уучлалыг хүлээж авсанд баярлалаа
Амраглал хэдий амттай ч ихэдвэл амьдрал болохгүйг би ойлгосоон
Аальгүйтэх хүүхнүүд хөөрхөн ч хань болохгүй гэдгийг ухаарсаан
Аргадаж уучлах чиний минь сэтгэл ээжийнхтэй минь ижил гэдгийг
Алаг зүрхний угаасаа мэдэрсэн ахиж наддаа ирсэн хайрын эзэн минь
Шөнөөр үлдээж уйлуулсан өдөр хоног бүрээсээ уучлалт гуйж байна
Ширүүн хандаж харилцуураа тасалсан өдрөөсөө уучлалт гуйж байна
Шимийн архи хүртэж мартах гэж зовсон сэтгэлээс тань уучлалт гуйя
Шархалсан зүрхэнд үлдээсэн дурсамж бүрээсээ уучлалт гуйж байна
Кана.Б
