Урлагийн гавьяат зүтгэлтэн, зураач Я.Оюунчимэг энэ сарын 26-нд 17.00 цагт “Цагаандариум” арт галерейд шинэ бүтээлийн бие даасан үзэсгэлэнгээ дэлгэх гэж байна. ОХУ-н И. Репиний Академийг дүүргэсэн тэрбээр Дүрслэх урлагийн дээд сургуульд зураасан зургийн мэргэжлийн багшаар 32 жил ажиллаж олон сайхан уран бүтээлч шавь төрүүлсэн юм.
Зөөлөн уур амьсгал бүхий уран бүтээлийн өвөрмөц арга барилаараа бусад уран бүтээлчдээсээ ялгардаг түүнийг "Усан будгийн мастер зураач", "Хөрөг зургийн мастер" хэмээдэг. Тэрбээр монголын шилдэг эмэгтэй уран бүтээлчдийн хөргийг мөнхөлсөн бөгөөд дан ганц хөрөг гэлтгүй байгаль, аж байдлын зургууд нь ч олны анхаарлыг татсаар ирсэн юм.
Тэрбээр дэлхийн олон оронд бие даасан болон хамтрасан үзэсгэлэнгээ нээж байсан бөгөөд энэ онд “976 Art Gallery”-д болсон "Ертөнцийн гэрэл гэгээ" эмэгтэй уран бүтээлчдийн үзэсгэлэн болон “Цагаандариум” арт галерейд дэлгэгдсэн "Бүсгүйчүүд" хамтарсан уран бүтээлийн үзэсгэлэнд тус тус уран бүтээлээ дэлгэж байсан юм. Харин энэ удаад түүний бие даасан уран бүтээлийг тольдох боломж олдох нь ээ.
www.URLAG.mn
