Мисс гэхээр л хүн бүхний нүдэнд урт намирсан үс, цав цагаан шүд, тунгалаг булбарай арьстай бүсгүйчүүд гараа даллаад инээмсэглэж байгаагаар төсөөлөгддөг нь нууц биш. Харин энэ хэвшмэл байдлыг эвдэж Филиппины Миссийн тэмцээнд халзан бүсгүй түрүүлсэн тохиолдол гарчээ.
Миссийн титмийг өмссөн тэр азтай бас зоригтой бүсгүй бол 19 настай Юта мужаас ирж оролцож буй Анжелика Галиндез. Түүний үс нь 12 настайгаас нь туг тугаар унаж, халзрах өвчин туссан ба 3 жилийн дараа буюу 15 насандаа бүрэн халзарсан байна.
Анжелика Галиндез хэлэхдээ ”Үсгүй болсон нь надад үнэхээр хүнд цохилт болж, сургуульдаа малгай өмсөж явдаг болсон. Толгойноосоо болж байнга хөвгүүдэд шоглуулж, доог тохуу нь болдог байсан минь хамгийн хүнд үе минь юм. Том болох тусам би бүхнийг ухаарч миний үс яаж ч хүсээд эргэж ургахгүй юм байна гэдгийг мэдэхийн зэрэгцээ өөрийгөө хууралгүй амьдрахаар шийдсэн.
Мисс болно гэж зүүдэлж ч байсангүй. Энэ бүхэн миний шийдвэр байгаагүй учир нь найзууд маань миний урт хүрэн хиймэл үстэй зургийг тэмцээний зохион байгуулагчдад явуулсан байсан. Өөрийнхөөрөө байх нь чиний гоо үзэсгэлэнгийн сонгомол илэрхийлэл юм шүү гэдгийг л би харуулахыг зорьсон юм” гэжээ.
Миссийн тэмцээн зохион байгуулагч Эдкинс-Түүнийг халзан гэдгийг бид тэмцээн эхлэхээс 7 хоногийн өмнө л мэдсэн бөгөөд оруулах эсэхдээ эргэлзэж байсан. Гэвч эцсийн шийдвэр гарахад бид түүнийг төгс оролцогч гэдэгт нь бүрэн итгэсэн гэжээ.
Бүсгүйчүүдээ, өөрсдийн гэсэн бүхий л зүйлдээ сэтгэл хангалуун, өөртөө итгэлтэй, өөрөөрөө бахархдаг байх нь эмэгтэй хүний жинхэнэ гоо үзэсгэлэн юм шүү!
Эх сурвалж: cosmopolitan.mn