Дэлгэцийн анхны уран бүтээлээрээ “тавилан” Амараа гэгдэж, удалгүй “Боолын гэрээ”, “Бодлын хулгайч”-ийн Амараа “болж”, тэндээсээ Холливуудад хөл тавьсан Монголын анхны жүжигчин гэдгээ “Холливууд” Амараа хочоороо баталж, өдгөө найруулагч Б.Амарсайхан хэмээн дуудуулж буй түүнийг үзэгчид андахгүй мэднэ.
“Тавилан”, “Удирдагч”, “Уулын хөх сүүдэр”, “Боолын гэрээ”, “Цасан охин”, “Бодлын хулгайч”, “Аравт”, “Үргээлэг”, “Үргээлэг-2”, “Итгэл”, “Mongolian connection”, “Under the turquoise sky”, “Хохирогч”, “Эргэж ирэхгүй намар”, “Монгол”, “Орлон тоглогч” гээд түүний тоглосон, найруулсан уран бүтээлүүд бүгд л үзэгч, шүүмжлэгчдээс өндөр үнэлгээ авсан.
Б.Амарсайхан сүүлийн гурван жилийн хугацаанд гэхэд л “Хохирогч” олон ангит киногоороо уржнан хавар үзэгчдийг дэлгэцийн өмнө “уясан” бол намар нь “Эргэж ирэхгүй намар”-аараа “Оскар”-ын наадамд эх орноо төлөөлөн оролцсон. Харин ноднин “Монгол” уран сайхны киногоо үзэгчдэд хүргэж, энэ жил “Орлон тоглогч” олон ангит киног олны хүртээл болгосон. Тэгвэл тэрбээр шинэ уран бүтээлд ажиллаж буйгаа фэйсбүүк хуудсаараа дамжуулан мэдэгджээ. Түүний ирэх 2025 онд үзэгчдэд хүргэхээр төлөвлөн ажиллаж буй шинэ уран бүтээлийнх нь нэрийг “Шалз” гэх бөгөөд зураг авалт нь ид үргэлжилж буй аж.
