Алдарт бүжигчин, бүжиг дэглээч Махмуд Эсамбаевагийн нэрэмжит 15 дахь удаагийн мэргэжлийн гоцлол болон хослол бүжигчдийн уралдаан өнгөрсөн долоо хоногт ОХУ-ын Грозный хотод болж өндөрлөлөө.
Тус уралдаанд манай улсаас Үндэсний урлагийн их театрын бүжигчин А.Түвшинбаяр, Б.Мөнхжингоо нар хослол бүжгийн төрөлд Урлагийн гавьяат зүтгэлтэн Ш.Өлзийбаяр, бүжиг дэглээч С.Цэцгээгийн “Тэнгэрийн хутагт” бүжгэн жүжиг, М.Мишээл гоцлол төрөлд бүжиг дэглээч Х.Хашхүүгийн “Наадъя” биелгээ бүжгээр тус тус оролцож, тэргүүн байр эзэлжээ.
Ташрамд дурдахад, Үндэсний урлагийн их театрын бүжигчин А.Түвшинбаяр нь 2015, 2017 онд ӨМӨЗО-д зохион байгуулсан Монгол бүжгийн их наадмаас алтан цом хүртэж, 2022 онд Ардын багш, Гавьяат жүжигчин, бүжиг судлаач, дэглээч, профессор Г.Долгорсүрэнгийн нэрэмжит гоцлол бүжигчдийн анхдугаар уралдааны тусгай байр, мөн онд “Nomadic” олон улсын уралдааны контемпорари төрөлд тэргүүн байрт тус тус шалгарч байв. Мөн энэ оны долдугаар сард БНСУ-ын Сөүл хотод болсон21 дэх удаагийн Сөүлийн бүжгийн А зэрэглэлийн уралдаанд тэргүүн байр эзэлсэн юм. Тэрбээр “Хэлхээ намба”, “Тогууд”, “Orphan Swan”, “Дэггүй гурав” зэрэг бие даасан уран бүтээлээс нь гадна “Марко поло” мюзиклын Марко поло, “Монголын их хатад” бүжгэн жүжгийн Эсэн тайж, “Тэнгэрийн хутагт” бүжгэн жүжгийн Данзанравжаагийн дүрийг тайзнаа амилуулсан юм.
