Гарамгай уран бүтээлчдийн “Virtuoso gala concert-2024” энэ сарын 31-нд Улсын филармонид болох аж. Зохион байгуулагч нь “Виртүс” академи бөгөөд 21 дэх жилдээ үзэгчдэд хүргэж байна.
“Виртүс” академийн зүгээс уг тоглолтыг өсвөрийн болон залуу уран бүтээлчдийг дэмжих зорилгоор зохион байгуулахдаа үзэгчдийн сонгодог хөгжмийн талаарх ойлголт, мэдлэгийг тэлэх, танин мэдэхүйд нь нэмэр болохыг эрхэмлэдэг. Энэ үүднээс гала тоглолтод үндэсний болон сонгодог хөгжмийн зэмсгээр хичээллэдэг, тоглодог уран бүтээлчдээс нэг, нэгийг сонгож оролцуулах зарчим баримталдаг.
Харин энэ жил Монгол Улсын Консерваторын оюутан Д.Зөөлөнсий эл тоглолтод уригджээ. Залуу виолончельч Д.Зөөлөнсий 2024 онд Испани улсын, “Beyond the music” уралдааны тэргүүн байрын эзэн. Мөн АНУ-ын, “Крешендо” уралдааны тэргүүн болон дэд байрын шагналтай. Тэрбээр ОХУ-ын “Найдал” уралдаанд амжилттай оролцсон бөгөөд БНЧУ-ын Хераны нэрэмжит, Ардын жүжигчин Ж.Чулууны нэрэмжит олон улсын уралдаан тус бүрт тусгай байр эзэлсэн, ОХУ-ын, О.Л.Лундстермийн нэрэмжит фестиваль, мастер класс, оркестрын тоглолтод амжилттай оролцсон юм.
Тэрбээр “Virtuoso gala concert-2024”-д Унгарын нэрт хөгжмийн зохиолч Д.Попперын “Унгар рапсоди” тоглох аж. Уг бүтээлээс унгар ардын дуу хуурын өнгө, бүжгийн хэмнэлийг мэдэрнэ. Дэлхийн хөгжмийн түүхэн дэх “унгар рапсоди” хэмээх байр суурийг ч энэхүү рапсоди илтгэдэг байна.
