Уран бүтээлч Ө.Буянхишиг “Манангаас үүл” бие даасан үзэсгэлэнгээ “Art of UB” галерейд дэлгэлээ.
Тэрбээр эл үүэсгэлэнгийнхээ талаар “Манан шиг хүн байна гэдэг хорвоогоос ангид баясал мэдрэвч, хэмжээлшгүй гүн шаналдаг. Манан шиг байгалийн агаар, хөрсний бохирдлыг цэвэрлэх чадвартай сан бол хүмүүний нийгмийн сэтгэлийн хог, буртаг, муу үйлдлүүдийг цэвэрлэх сэн. Гэхдээ миний чадах нь уучлах, өршөөх, хохирсон ч хайрлаж тэнэг зоригтойгоор сайн хүнээрээ үлдэх юм. Гэвч би манан шиг устах уу, эсхүл үүл болон дэгдэх үү.
Үүл болон дэгдвэл хүмүүний сэтгэлийн утсыг хөндсөөр ирсэн уй шаналал гунигт зовлонг гүн шингээсэн зохиолууд дүр санаануудаас бүрэн чөлөөлөгдөж хүмүүний ангижирч чадаагүй орчлонгоос амьд байхдаа ангижирч чадах буй.
Өөрөө өөрөөсөө сайн найзаа олж, өөрийгөө уучилж, нийгэм байтугай өрөөлийн амьдралд санаа зовохгүй дэгдэн дэвшиж жаргана. Амьдрал уг нь яруу сайхан, хүн уг нь ухамсарт адгуус гэвч…
Бид газраас хөлөө , гараа хэтэвчнээс, нүдээ утаснаас салгахгүй зохиомол баригдсан хэв маягт гунигтай, хэрсүү, айхтар нэгэн болох гэж орших юм.
Тэгвэл би энэ үзэсгэлэнгээрээ таныг хүрч үзээгүй үүлийг барьж, гишгэж үзээгүй газраа гишгэж, сэтгэлгээний эрх чөлөөнд жаргаасай гэж уриалмаар байна. Бурхнаас өгсөн таван мэдрэхүйгээрээ хязгааргүй сэтгэлгээгээр миний бүтээлийн өнгө, бийрийн таталтаар минь өөрөө өөртөө өөр ертөнцийг бүтээж, эрх чөлөөтэйгөөр аялж, энэ нийгэмд өнгө нэмэн хайрлагч, энэрэгч байгаарай гэж уриалмаар байна” хэмээжээ.
