Морин хуурч өвөө, шанз хөгжимчин эмээгээ даган урлагт дурласан Н.Шүрэнцэцэг 1996 онд Монгол Улсын Консерваторын хийл хөгжмийн ангид суралцаж байгаад 2000 оноос ёочин хөгжмийн ангид суралцаж, давхар мэргэжилтэй болж төгсжээ. “Сонсогчдыг гадаад үзэмж, үйл хөдлөлөөс илүү сонороороо дамжуулан хөгжимчний олон гоё өнгө зургийг зүрхэндээ “зурдаг”, мэдэрдэг байгаасай гэж хүсдэг учраас зүрх сэтгэлээсээ тоглохыг эрмэлздэг” хэмээсэн Н.Шүрэнцэцэг 2009 онд “Ёочингийн эгшиг” бие даасан анхны тоглолтоо хийж байлаа.
Өдгөө Монголын мэргэжлийн хөгжмийн салбарт шинэ өнгө төрх, хөг нэмж яваа тэрбээр Үндэсний урлагийн их театрын Монгол Төрийн үндэсний хөгжмийн Их найрлын гоцлол хөгжимчин. Ёочинч Н.Шүрэнцэцэг бие даасан удаах тоглолтоо “Галт шувуу” нэртэйгээр хийхээр болжээ. Түүний тоглолт Үндэсний урлагийн их театрт арваннэгдүгээр сарын 22-нд 19.00 цагаас болно.
