“Дон Кихот” балетыг М.Д.Сервантесийн “Ла Маншийн ноён Кихот” романаас сэдэвлэн бүтээсэн бөгөөд алдарт дэглээч М.Петипа Л.Минкусын хөгжим дээр дэглэн тавьж, 1869 оны арванхоёрдугаар сарын 26-нд Москва хотын Большой театрын тайзнаа анхлан тоглож байв.
Харин Монголын тайзнаа анх 1971 оны гуравдугаар сарын 1-нд тоглосон түүхтэй. Эхлэл бүхий гурван бүлэг, дөрвөн үзэгдэлт энэхүү балетын балетмейстраар Төрийн шагналт, Хөдөлмөрийн баатар, Ардын жүжигчин, Б.Жамъяндагва анхлан ажиллаж, гол дүрд “Ардын Ганбаа” хэмээх нэрээр олноо алдаршсан Ардын жүжигчин, балетын дасгалжуулагч багш, ахмад балетчин О.Ганбаатар тоглож байжээ.
Л.Минкусын “Дон Кихот” балетыг энэ амралтын өдрүүдэд буюу арваннэгдүгээр сарын 9, 10-нд ДБЭТ-ын тайзнаа толилуулна. Монголын тайзнаа 66, 67 дахь удаагаа тоглох энэ удаагийн тоглолтыг Ардын жүжигчин О.Ганбаатарын мэндэлсний 80 насны ойд зориулан тоглох аж. Түүнчлэн энэ өдрүүдэд 1962 оноос ДБЭТ-т балетын гоцлоочоор ажилласан, Монголын балетын анхны гоцлол бүжигчдийн нэг О.Ганбаатарын тоглож байсан дүрүүд, уран бүтээлүүдийн үзэсгэлэнг мөн дэлгэх аж.
