ДБЭТ-ын уран бүтээлчид энэ амралтын өдрүүдэд буюу аравдугаар сарын 16, 17-нд Ж.Бизегийн “Кармен” дуурийг толилуулна. Хүсэл, шунал, мэдрэмж, хүчирхийллийг тайзан дээр ихээр харуулдаг энэхүү бүтээл нь 1875 онд нээлтээ хийснийхээ дараа ихээхэн шүүмжлэл дагуулж байсан ч тун удалгүй асар их амжилт олж, дэлхий дахинаа хэдэн зуун удаа тоглогддог хосгүй бүтээл болжээ.
П.Меримегийн алдар сууг гэрчлэх гайхамшигт бүтээл “Кармен хүүхэн” зохиолоос сэдэвлэн дэлхийн хөгжмийн гайхамшиг “Кармен” дуурь бий болсон түүхтэй. Хувь зохиол нь ч, зан араншин нь ч халуухан, эрх чөлөөт цыган бүсгүйн дотоод ертөнцийн их эрч хүчийг гаргаж чадсанаараа “Кармен” дуурь гайхалтай юм.
Түүнчлэн уг дуурьт гардаг аагим халуунаар төөнөх Испанийн нар, хатуу дэгтэй цэргүүд, тариачид, олон түмэн, цыганууд, хил дамнан хулгайгаар наймаа хийдэг наймаачид, XIX зууны Севиль хотыг тайзнаа бодитоор бүтээн үзэгчдэд толилуулдагаараа онцгой. 1985 онд энэхүү бүтээлийг ДБЭТ-ын тайзнаа монгол хэлээр анх тавьсан бөгөөд түүнээс 30 жилийн дараа 2013 онд дахин шинээр, франц хэлээр, анхны эхээр нь тавьж байв.
Энэ амралтын өдрүүдэд толилуулах “Кармен” дуурийн гол дүрд Гавьяат жүжигчин М.Дариймаа, Т.Чулуунчимэг дуулна.
“Кармен” дуурийн дүрүүдийн танилцуулгыг хүргэе.
