ЗХУ-ын Ардын жүжигчин Муслим Магомаевын дурсгалд зориулсан “Орфей-2024” олон улсын уралдаан өнөө жил долоо дахь удаагаа боллоо.
Тус уралдаанд ОХУ-ын хөгжмийн дээд боловсролын тэргүүлэх академи, мэргэжлийн их, дээд сургуулиуд болон ОХУ-ын Большой, Мариинский, Новая опера, Геликон-Опера зэрэг томоохон театрууд, бүс нутгуудын эрдмийн театруудаас мэдүүлсэн тэргүүн гоцлоочдын дунд Гнесиныхны нэрэмжит Москвагийн Хөгжмийн академийн магистрантурт суралцаж буй 25 настай монгол оюутан Баатарын Доржнамжингийн нэр ороод байсан юм.
Тодруулбал, энэ жил есөн орны 200 гаруй мэргэжлийн дуурийн дуучид нэгдүгээр шатанд оролцсоноос хоёрдугаар шатанд 81 дуучин тунаж үлдсэн бөгөөд хоёрдугаар шатанд шалгарсан дуучид Бүгд Найрамдах Чечень Улсын “Сувдан сондор” хэмээн өргөмжлөгдсөн Филармонийн тайзнаа өрсөлдсөн юм.
Тэгвэл энэхүү нэр хүндтэй уралдаанд Б.Доржнамжин амжилттай оролцож, гутгаар байр эзэлжээ.
