Хүн бүрт хөгжмийн боловсрол уриатай “Тотал мюзик” компаниас жил бүр “Гитарын өдөрлөг” зохион байгуулдаг. Дөрөв дэх жилдээ зохион байгуулсан эл өдөрлөгийн үеэр дэлхийд цор ганц бүтээгдсэн гитарыг танилцуулж, шинэ салбарынхаа үзэсгэлэнгийн танхимд байршууллаа.
Энэхүү гитар нь “Fender” брэндийн ерөнхийлөгч Энди Мунийн санаачлан, дэлхийн энх тайвныг бэлгэдэж бүтээсэн “Stamp collection” буюу шуудангийн маркийн цуглуулгаар бүтээсэн коллекцийн гитар юм. Уг коллекцийг дэлхийн 195 оронд тус бүр онцгой нэг хувийг зориулан бүтээснээрээ онцлог бөгөөд нийт 20.000 ширхэг шуудангийн марк ашиглажээ.
Манай улсад зориулан бүтээсэн, Монголын шуудангийн маркаар урласан энэхүү гитар нь хөгжмийн соёлд үнэтэй хувь нэмэр оруулах өвөрмөц бүтээл төдийгүй гитар дээрх маркуудаас Монголын түүх, соёлын өв, уран нарийн хийц, хэв маягуудыг харж болох аж.
