Пусаны кино наадмын “Азийн урлаг” хэсэгт шалгарсан “Шарга даага” уран сайхны кино энэ сарын 10-наас “Тэнгис”, “Өргөө”, “Соёмбо” кино театрт үзэгчдийн хүртээл болох нь. “Улаанбаатар” олон улсын кино наадмыг нээсэн энэ киноны найруулагч нь Ч.Хоролдорж.Монгол Улсад анх удаа “48 цаг” кино наадам болоход тэргүүлсэн авьяаслаг найруулагч.Түүний анхны бүрэн хэмжээний уран сайхны кино нь “Шарга даага” юм билээ. Япон зураглаачтай хамтран бүтээсэн энэ киног нь өнгөрсөн онд кино наадмын хүрээнд цөөн хүн үзэж байсан юм. Олон улсын хэмжээнд үнэлэгдээд буй энэ бүтээлд нутаг руугаа гүйсэн шарга даага болон төрсөн гэртээ идээшиж чадахгүй байгаа хүүгийн тухай өгүүлдэг.
Галт хүүг өргөж авсан авга ах нь өөд болсноор киноны үйл явдал эхэлдэг. Төрсөн гэртээ эргэж ирсэн нь хүүд тийм ч таатай байсангүй. Үргэлж л өссөн гэрээ санагалзан үгүйлнэ.Наадам болох гээд нутгийн хүмүүс хөл ихтэй байхад бяцхан хүүгийн зүрх л шаналгаатай. Тэгтэл тэдний уяан дээр нэгэн шарга дааган гүйн ирнэ.
Нутаг руу эргэн тэмүүлж яваа тэр даагыг унаж наадамд уралдах хүсэл тээн Галт бэлдэж эхэлнэ. Даага, хүү хоёрын сэтгэлийн тэмүүлэл нэгэн уулзварт ирснээр киноны учиг тайлагддаг. Төрсөн нутаг, ах дүү гэр бүлийн харилцааны нандин сайхныг өгүүлсэн энэ киног бүх насныханд зориулан бүтээжээ.
Ж.Сэлэнгэ
