Ж.Пуччинийн “Богема” дуурийг ДБЭТ-ын театрын уран бүтээлчид энэ амралтын өдрүүдэд толилуулна. Ингэхдээ дуурийн гол дүр Мимиг Гавьяат жүжигчин С.Мөнгөнцэцэг амилуулах аж.
1849 онд А.Мюржегийн бичсэн “Богемчуудын амьдрал” хэмээх романаас сэдэвлэн 1849 онд Т.Барре тайзнаа жүжиг болгон Парис хотноо маш амжилттай тоглож байсан аж. Дараа нь энэ зохиолоор Ж.Пуччини дуурь бичсэн байна. Ж.Пуччини энэ уран бүтээлээр өөртөө авьяас хэмээх асар их баялаг бүхий уран бүтээлч залуус мөнгөгүйгээс болж ямар өрөвдмөөр үл үзэгдэх зовлонг туулж байгаа харуулахыг зорьжээ. Дөрвөн үзэгдэлтэй “Богема” дуурийг 1896 оны хоёрдугаар сарын 1-нд Турин хотын “Реджо” театрт тоглож байжээ.
Харин манай улсад Ж. Пуччинийн “Богема” дуурийг ДБЭТ-ын тайзнаа 2004 оны тавдугаар сарын 7-нд анх тоглосон бөгөөд дуурийн найруулагчаар Урлагийн гавьяат зүтгэлтэн Г. Эрдэнэбаатар, удирдаачаар Урлагийн гавьяат зүтгэлтэн Н. Туулайхүү, ерөнхий зураачаар Урлагийн гавьяат зүтгэлтэн Г.Ганбаатар нар ажиллаж байжээ.
