УДЭТ-ын уран бүтээлчид хайрын тухай шинэхэн жүжгээр үзэгчдэдээ бэлэг барихаар боллоо. Тодруулбал, Нобелийн шагналт зохиолч Харольд Пинтерийн “The lover” жүжгийг найруулагч Г.Ган-Очирын шинэ найруулгаар энэ сарын 29-нөөс УДЭТ-ын тайзнаа тоглох юм. Найруулагч Н.Наранбаатар уг жүжгээс сэдэвлэн “Өчигдөр” хэмээх жүжгийг 2014 онд найруулан тавьж байсан бол энэ удаа найруулагч Г.Ган-Очир “Хайр хэнд хэрэгтэй вэ” гэсэн тодотгол дор, цоо шинэ найруулгаар үзэгчдийн хүртээл болгох юм. Эл жүжгийн гол дүрд УДЭТ-ын жүжигчин М.Тогтохжаргал тоглоно.
СУИС-ийг 2006 онд төгсөж, 2008 оноос хойш УДЭТ-т тасралтгүй ажиллаж буй М.Тогтохжаргалыг өдгөө театрын урлагт дурлагсад андахгүй. Тэрбээр уран бүтээлийн гараагаа 2008 онд Л.Толстойн “Алтан түлхүүр” жүжгийн Малевина, 2009 онд Б.Лхагвасүрэнгийн “Тамгагүй төр” жүжгийн Гүргэл бага хатны дүрд тоглон эхэлж, өнөөдрийг хүртэл 50 гаруй жүжгийн гол болон туслах дүрд тоглоод байна. Хамгийн сүүлд гэхэд л тэрбээр өнгөрсөн онд Увс аймгийн “Ойрад” театр, Булган аймгийн Хөгжимт жүжгийн театрт В.Красногоровын “Би ч гэсэн жаргамаар байна”, Завхан аймгийн Хөгжимт жүжгийн театрт Б.Цогнэмэхийн “Асарын өндөр” жүжгийн гол дүрд тоглосон бол УДЭТ-таа энэ жил Л.Н.Толстойн “Анна Каренина” жүжгийн Бетси Тверская, Б.Цогнэмэхийн “Тэнгэрийн хүү” жүжгийн Бүни гүнжийн дүрд тоглоод буй.
