Тун саяхан “Алтан гадас” одонгоор энгэрээ мялаасан загвар зохион бүтээгч Д.Отгонжаргал хувцас загварын хаут кутюр чиглэл буюу дахин давтагдашгүй, цорын ганц, гар ажиллагатай бүтээл туурвидгаараа алдартай. Түүнчлэн манай улсад энэ чиглэлээр дагнан уран бүтээл туурвидаг цөөхөн загвар зохион бүтээгчийн нэг гэхэд хилсдэхгүй. Тэрбээр 2014 онд “O couture” тансаг зэрэглэлийн брэндээ үүсгэн байгуулж, 2015 онд анхны загварын шоугаа хийж байв. Тухайн онд Азийн шилдэг загвар зохион бүтээгчээр шалгарч, 2023 онд түүнийгээ бататган Азийн хошой шилдэг загвар зохион бүтээгч болсон юм. Тэрбээр “O couture” брэндийнхээ загварын шоуг жил бүрт уламжлал болгон зохион байгуулдаг бөгөөд өнөө жил эл шоуных нь 10 жилийн ой тохиож буй. Арванхоёрдугаар сарын 6-нд “АСА арена”-д болох энэ удаагийн шоунд Монголын тал нутгийн оюун санаа өв соёлоо сэргээн амилуулсан, тансаг даавуу, уран хатгамал, нүүдэлчдийн сэтгэл татам баялаг өв уламжлалыг орчин үеийн загвартай хослуулан танилцуулахаараа онцлог байх бөгөөд шоуны цор ганц, дахин давтагдашгүй загваруудыг Монголын болон гадаадын супер моделиуд өмсөж тайзнаа амилуулах юм.
