УДЭТ-ын уран бүтээлчид Оросын нэрт зохиолч Лев Толстойн “Анна Каренина” жүжгээ шинэ бүрэлдэхүүн, шинэ “Анна”-тайгаар энэ оны тавдугаар сард үзэгчдийн хүртээл болгосон. Тэгвэл хоёр бүлэг, 23 үзэгдэлт эл жүжгээ энэ сарын 11-15-нд тавхан удаа дахин толилуулахаар болсон. Энэ удаа эл жүжгийн гол дүрүүдийн нэг Алексей Каренинд УДЭТ-ын залуу жүжигчин И.Дашнамжил тоглохоор болжээ.
2020 онд СУИС-ийг жүжигчний мэргэжлээр төгсмөгцөө УДЭТ-т ажиллаж буй залуу жүжигчин И.Дашнамжил өнгөрсөн хугацаанд Б.Цогнэмэхийн “Хаадын хаан: Андгай” түүхэн жүжгийн Бэлгүтэй, Берхольт Брехтийн “Сычуаны сайн хүн” гротеск драмын жүжгийн Цагдаа, Н.В.Гоголийн “Тоглоомчид” жүжгийн Аделаида Ивановна, У.Шекспирийн “Ромео, Жульетта” сонгодог жүжгийн Бальтазар, Б.Мөнх-Амьдралын “Миний аав супер баатар” хүүхдийн жүжгийн Аав шоргоолж, Ц.Балдоржийн “Хайрын виз” уянгын драмын жүжгийн Зөөгч, Л.Н.Толстойн “Анна Каренина” сонгодог жүжгийн Офицер, Б.Цогнэмэхийн “Тэнгэрийн хүү” түүхэн туульсын жүжгийн Аргун баатарын дүрд тоглоод буй. Дэлгэцийн уран бүтээлийн тухайд тэрбээр “Бүлэг” олон ангит кинонд анхлан тоглож байсан бол түүний тоглосон “Гарц” олон ангит кино, “Z zone” аймшгийн кино яг одоо үзэгчдэд хүрч буй.
