Жүжигчин Ариана буюу Г.Ариунболорыг үзэгчид 2013 онд “LVA” энтертайнментын “Дурлалын гэмт хэрэг” уран сайхны киноны гол дүрд тоглосноор нь эчнээ мэднэ. Түүнээс хойш тэрбээр ХБНГУ-д ажиллаж, энэ хугацаандаа тайз, дэлгэцийн 30 шахам уран бүтээлд тогложээ. Түүнчлэн тэрбээр 2019 онд ХБНГУ-д зохион байгуулдаг Мюнхены олон улсын кино наадмын шилдэг залуу уран бүтээлчэр тодорч, АНУ-ын Калифорнийн Палм Спрингсийн “Күйн Палм” кино наадмаас шилдэг туслах эмэгтэй дүрийн шагнал хүртэж байлаа. Харин Монголын үзэгчидтэй тэрбээр 2022 онд найруулагч Б.Амарсайханы “Хохирогч” олон ангит киноны гол дүрээр дахин уулзсан юм. Тэгвэл тун удахгүй “Бүсгүй” уран сайхны киноны гол дүрээр дахин учрах гэж байна. Тодруулбал, “Хурд” хамтлаг 30 жилийн ойдоо зориулан “Бүсгүй” дуунаасаа сэдэвлэсэн бүрэн хэмжээний уран сайхны кино бүтээснээ үзэгчдэд хүргэх гэж буй. Ирэх оны нэгдүгээр сарын 16-наас бүх кинотеатруудаар үзэгчдийн хүртээл болгох “Бүсгүй” уянгын драмын киноны гол дүрд жүжигчин Г.Ариунболор, С.Ариунбямба нар тогложээ.
