Хомэрийн их хөлгөн туульс “Илиада”, “Одиссэй” бүтээлүүдийг орчуулан, Монголын уншигчдад өргөн барьснаар утга зохиолд шимтэгсдийн эчнээ мэдэх Соёлын гавьяат зүтгэлтэн Д.Цахилгаан шинэ номоороо уншигчидтай дахин “уулзаж” байна. Тодруулбал, Данте Алигьеригийн “Тэнгэрлэг туульс”-ыг Соёлын гавьяат зүтгэлтэн Д.Цахилгааны дуун хөрвүүлгээр, шинэ дүр төрхтэйгөөр “Монсудар” хэвлэлийн газар эрхлэн гаргаж, номын нээлтийг өнөөдөр /2024.12.12/ хийлээ. Нээлтийн үеэр Д.Цахилгаан “Бүхэлдээ энэ цагийн залуу хүмүүст зориулсан зууч” хэмээн эл бүтээлээ онцолсон юм. Түүнчлэн “Өөр лүүгээ харах, өөрийн сайн мууг таньж мэдэх, түүгээр дамжуулан өнөө үеэ таних залуу хүнд хүрэх учиртай бүтээл” хэмээсэн.
Сонирхуулахад, XIV зууны агуу зохиолч Данте Алигьери 1307-1321 оны хооронд “Тэнгэрлэг туульс”-аа бичсэн байдаг. Уг суут бүтээл нь өгүүлэмж, агуулга, зохиомж, хэлбэрийн талаасаа Өрнөдийн уран зохиолд бичлэгийн шинэлэг аргыг үүсгэсэн учраас хойч үеийн уран бүтээлчдэд ихээр нөлөөлжээ.
