Өнөөдөр Гавьяат жүжигчин Н.Нэргүйбаатарын мэндэлсэн өдөр. Тэрбээр 1954 оны энэ өдөр Улаанбаатар хотод төржээ.
Н.Нэргүйбаатар багаасаа кино үзэх дуртай, дэлгэцийн бүтээлд татагддаг хүүхэд байж, кино механикчийн гаргаж өгдөг кинонуудыг алгасалгүй үзэхийг хичээдэг байсан тухайгаа ярилцлагадаа дурссан байдаг. Кино үзэх бүрдээ дэлгэцийн жүжигчид шиг болохыг мөрөөддөг байсан нь хожим түүний мэргэжлээ сонгох замд нөлөөлжээ.
Нэгэн өдөр жүжигчний түргэвчилсэн хоёр жилийн сургалтад элсэлт авч байгааг сонсоод шалгалт өгөхөөр шийдсэн байна. Тухайн үеийн нэрт уран бүтээлчид болох Ж.Бунтар, Д.Чимэд-Осор, Д.Жигжид нар шалгалт авч, Н.Нэргүйбаатар жүжигчний мэргэжлээр суралцахаар шалгарсан тавин хүүхдийн нэг болжээ. Түүний ангийн багш нь У.Осор байв. Суралцах хугацаандаа жүжиглэх ур чадвараа хөгжүүлж, хоёрдугаар курсээ төгсөхөд “Монгол кино” үйлдвэрт орон тооны жүжигчнээр ажиллах болсон нь мэргэжлийн уран бүтээлийн замналынх нь эхлэл байлаа.
Түүний дэлгэцийн уран бүтээлүүдээс “Бид мартахгүй” киноны Жавын дүр, “Илүү сартай зун” киноны Дагвын дүр онцгойлон нэрлэгддэг. Мөн “Даль хагдрах цагаар”, “Мөнгөн буйл”, “Талийгаач”, “Хүн чулууны нулимс” зэрэг кинонд дүр бүтээсэн байна.
1993 оноос Н.Нэргүйбаатар Монголын үндэсний телевизэд орчуулгын киноны жүжигчнээр ажиллаж эхэлсэн. Энэ үеэс түүний уран бүтээлийн гол чиглэл орчуулгын киноны дуу оруулалт болж, гадаадын киноны дүрүүдийг монгол хэлээр амилуулах ажилд олон жил зүтгэсэн байна. Орчуулгын кинонд дуу оруулах нь эх хэл дээрх үгийг орчуулаад унших төдий ажил биш. Тухайн дүрийн сэтгэл хөдлөл, ярианы хэмнэл, зан араншин, үйл явдлын уур амьсгалыг мэдэрч, дуу хоолойгоороо илэрхийлэх шаардлагатай. Н.Нэргүйбаатар энэ ур чадварыг олон жилийн туршлага, мэргэжлийн хөдөлмөрөөрөө эзэмшжээ.
Ийнхүү Монголын кино урлагт олон арван жил зүтгэсэн Н.Нэргүйбаатар гавьяат жүжигчин төдийгүй, монголчуудын дурсамжид дуу хоолойгоороо хоногшсон уран бүтээлч болсон юм.
