УДЭТ-ынхан энэ онд “Камерийн жүжиг” нэртэй төсөл хэрэгжүүлэхээр болжээ. Энэ ажлын хүрээнд долоон найруулагч тус бүртээ шинээр жүжиг найруулах юм байна.
Төрийн шагналт, найруулагч Н.Наранбаатар яруу найрагч, зохиолч Л.Өлзийтөгсийн “Ярилцлага”-ыг сонгосон бол ардын жүжигчин Б.Мөнхдорж А.Ванпиловын “Хэрээт төгөл”, урлагийн гавьяат жүжигчин Б.Баатар А.Очирбатын “Буруугүй буруутан”, Н.Ганхуяг өөрийнх өө зохиол “Тахиа, нохой, гахай” Ч.Найдандорж Дарио Фогийн “Чөлөөт хос”, Ч.Түвшин Люсиль Флетчерийн “Уучлаарай та дугаар андуурч”, Ц.Батнайрамдал Николай Колядагийн “Манекен” жүжгийг найруулахаар болжээ.
Тэд энэ сарын сүүлээр хуралдаж, аль жүжгээр төслөө эхлүүлэхээ хэлэлцэх гэнэ. Энэ онд тавихаар төлөвлөж байсан “Фауст”-ыг ирэх жил тоглохоор хойшлуулжээ.
Н.Наранбаатар “Миний сонгосон “Ярилцлага” зохиолд сэтгүүлчийн ёс зүйг уландаа гишгэж, хэн нэгний амьдралаар тоглон сониныхоо сурталчилгааг хийж, хэдэн төгрөг олдог сэтгүүлч, сонгууль болохоор өгөөмөр хүнлэг болдог хэрнээ сонгогдчихоороо мөн чанараа харуулдаг гишүүдийг хурцаар шүүмжилсэн” гэлээ. Тэрбээр Буддын шашны тухай жүжиг тавихаар судалгаа хийж байгаа юм билээ.
Б.Дөлгөөн
Эх сурвалж: Өнөөдөр