ДБЭТ-ын уран бүтээлчид арванхоёрдугаар сарын 28,29-нд “Тэнгэрийн элч” түүхэн сэдэвт дуурийг толилуулах гэж буй. Эл дуурийг ДБЭТ-ын ерөнхий удирдаач Ц.Тэлмүүн-Очир “дохих” юм.
Долоон настайгаасаа хийл хөгжимтэй “нөхөрлөж”, 20 гаруй жил сонгодог хөгжмөөр “хүмүүжиж” буй Ц.Тэлмүүн-Очир нь 2012 онд Монгол Улсын Консерваторыг хийл хөгжимчнөөр төгсөж, үргэлжлүүлэн 2016 онд СУИС-ийг хөгжмийн найруулагчаар дүүргээд, 2018 онд СУИС-ийг найрал хөгжмийн удирдаачаар, 2023 онд БНСУ-ын Урлагийн үндэсний их сургуулийг удирдаачаар суралцаж төгссөн уран бүтээлч юм. Урлагийн гавьяат зүтгэлтэн Н.Бүтэнбаярын нэрэмжит залуу удирдаачдын улсын анхдугаар уралдааны тэргүүн байрт шалгарч байсан тэрбээр өнгөрсөн хугацаанд Л.В.Бетховен, П.И.Чайковский, В.А.Моцарт, А.Дворжак, Ф.Шуберт, Р.Вагнер, И.Штраусс, Р.Штраусс, И.Стравинский гэх мэт хөгжмийн зохиолчдын симфони болон удиртгал хөгжмийн бүтээлүүдийг, мөн Ж.Вердийн “Трубадур” дуурь, Ж.Вердиийн “Риголетто” дуурь, Ж.Пуччинийн “Богема” дуурь, Ж.Пуччинийн “Madama Butterfly” буюу “Чио Чио Сан” дуурь, В.А.Моцартын “Увидаст лимбэ” дуурь, Б.Дамдинсүрэнгийн “Учиртай гурван толгой” дуурь, П.И.Чайковскийн “Щелкунчик” балет зэрэг ДБЭТ-ын уран бүтээлүүдээс гадна “Winter classic” уран бүтээлийн тоглолт, “Orchestra night” хөгжмийн концерт, “Их найрал эгшиглэн-100” тоглолтыг удирдан, олны хүртээл болгоод байна.
