Ёочинч Э.Пагма нь baroque, classical minimalism, worldwide урсгалаар хөгжимдөн уран бүтээлээ туурвидаг уран бүтээлч юм. Түүний хөгжим виртуоз хийгээд тайвшруулах, меланхоли илэрхийлэмжтэй. Тэрбээр Францын Страсбург хотын Хөгжмийн академид суралцаж байх үедээ өөрийн дотоод мөн чанар, арга барилаа олсон аж. Тэнд суралцах хугацаандаа 2022 онд Швейцарын Лугано хотын симфони найралтай, Италийн Ториногийн симфони найрал хөгжимтэй тус тус хамсран хөгжимдөж байлаа.
Тэрбээр өөрийн анхны дижитал цомгийн нээлтийг өнгөрсөн арваннэгдүгээр сарын 11-нд хийсэн юм. Эл цомог нь И.С.Бах, Г.Канчели, Ван Сэ, Цэн.Эрдэнэбат, Ш.Өлзийбаяр, Х.Алтангэрэл нарын зохиолоос бүрджээ. Гадаад бүтээлүүд нь Пагмын өөрт нь хамгийн ойр буудаг, түүний ур чадвар, сэтгэлгээг шаарддаг бүтээлүүд бол Монгол бүтээлүүд нь Монголын орчин цагийн хөгжмийн зохиолчдын охь дээж бөгөөд анх удаа ёочингоор бичигдэж цомогт орсон нь энэ юм. Тус цомог нь ёочингоор хөгжимдөх арга барилд шинэ техник, уур амьсгал оруулж чадсан гэдгийг хөгжим судлаачид онцлоод буй. Тэрбээр эл цомогтоо багтсан “Токката” бүтээлийнхээ клипийг үзэгчдэд хүргээд байна. Эл бүтээлийг хөгжмийн зохиолч Ш.Өлзийбаяр 2017 онд бичсэн бөгөөд хөгжимдөх хурд, ёочин хөгжмийн цангинасан дуугаралтыг харуулж, түүнчлэн төгөлдөр хуурчийн хэмнэл, дуурьсал зэрэг нь тус бүтээлийг онцгой болгожээ.
