УДБЭТ-ын уран бүтээлчид “Монголын нууц товчоо”, Их эзэн Чингис хааны түүхээс сэдэвлэн бүтээсэн, Монголын түүх уламжлалаа хойч үедээ үнэн зөвөөр ойлгуулж, өвлүүлэн уламжлуулах зорилготой “Тэнгэрийн элч” түүхэн дуурийг арванхоёрдугаар сарын 28, 29-нд хүргэх гэж байна. Энэхүү дуурийн гол дүр болох “Мөнх тэнгэрийн элч” хэмээн өргөмжлөгдөж явсан Аралуд аймгийн Наху баяны хүү Боорчид УДБЭТ-ын гоцлол дуучин Б.Батжаргал дуулах юм.
Б.Батжаргал нь СУИС-д дуурийн дуучин мэргэжил эзэмшиж, үргэлжлүүлэн БНСУ-ын Үндэсний урлагийн их сургуульд мэргэжил дээшлүүлсэн уран бүтээлч юм. 2012 оноос хойш УДБЭТ-т ажиллах хугацаандаа Ж.Бизегийн “Кармен” дуурийн Дон Хозе, Ж.Вердийн “Трубадур” дуурийн Манрико, “Травиата” дуурийн Алфред Жермон, Ж.Пуччинийн “Чио чио сан” дуурийн Пинкертон, “Богема” дуурийн Рудольф, Г.Доницеттийн “Лучиа Ди Ламмермур” дуурийн Эдгардо, Ц.Нацагдоржийн “Гүнгэрийн гүнж” дуурийн Цао Цао жанжин, Л.Мөрдоржийн “Хөхөө Намжил” дуурийн Хөхөө Намжил, Б.Шаравын “Чингис хаан” дуурийн Жамуха гэхчилэн дүрүүдэд дуулжээ. Тэрбээр 2015 онд ОХУ-ын Ардын жүжигчин Ким Базарсадаевын нэрэмжит дуурийн дуулаачдын олон улсын уралдааны гран при хүртэж, 2016 онд ОХУ-ын Москва хотод болсон Муслим Магомаевын нэрэмжит дуурийн дуулаачдын олон улсын уралдааны гуравдугаар байрт шалгарч, 2017 онд “BBC Cardiff Singer of the World” дуурийн дуулаачдын уралдаанд Монголын тенор хоолойнуудын анхдагч болж оролцон, дэлхийн шилдэг 20 залуу дуучны нэгээр тодорч байв.
